Денесінен көгерген іздер көрдім: Ашыбұлақта әйелдің өліміне қатысты тың деректер шықты

Алматы облысы Ащыбұлақ ауылында 29 жастағы әйелдің өліміне байланысты қылмыстық іс қозғалды. Марқұмның туыстары оның күйеуінен зорлық-зомбылық көрген болуы мүмкін екенін айтып отыр, деп хабарлайды Orda.kz.

Марқұмның әпкесі Әзиза Мырзақұлованың сөзінше, Гүлмира өмірге құштар, жақындарына үнемі көмектесіп жүретін адам болған. Туыстары оның өзіне қол жұмсағанына сенбейтінін жеткізді. Гүлмира медицина саласында білім алып, шамамен бес жыл ауруханада жұмыс істеген. 26 жасында өзінен 13 жас үлкен азаматқа тұрмысқа шығып, кейін егіз баланы дүниеге әкелген.

Туыстарының айтуынша, отбасында жанжал жиі болған. Қайғылы оқиға болған күні Гүлмира жақындарына бейнеқоңырау шалып, күйеуінің өзіне күш көрсететінін айтқан. Сондай-ақ денесіндегі жарақаттарды көрсеткені де айтылады. Марқұмның анасы Оразгүл Монбекова қызының өлімін отбасындағы зорлық-зомбылықпен байланыстырады.

«Зорлық-зомбылықтың кесірі деп ойлаймын. Басқа ешқандай себеп жоқ. Мәйітханада қызымның денесіндегі көгерген іздерді көрдім», – деді ол.

Ал марқұмның қайын атасы бұл айыптауларды жоққа шығарып, ұлы әйеліне қол көтеруі мүмкін емес екенін айтты. Алматы облысы полиция департаментінің ресми өкілі Ернар Сайділдин аталған дерек бойынша қылмыстық іс қозғалғанын растады.

«Аталған фактіге қатысты қылмыстық іс қозғалып, тергеп-тексеру амалдары жүргізілуде. Тергеу нәтижесі бойынша процессуалдық шешім қабылданатын болады», – деді полиция өкілі.

Қазір әйелдің денесінде зорлық-зомбылық белгілерінің бар-жоғын анықтау үшін сот-медициналық сараптама тағайындалған. Іс бойынша Гүлмираның күйеуі күдікті деп танылған. Оның кінәсі сотта дәлелденген жоқ. Сондықтан оның кінәсі туралы түпкілікті шешімді тек сот шығарады.

Оқи отырыңыз: 

• Future Games-2026: Павел Дуров Астанада өткен ЖИ олимпиадасы жеңімпаздарына 100 мың доллардан астам сыйақы береді
• Батыс Қазақстандағы күре жолда жүріп келе жатқан автобус жанып кетті