ДДСҰ хантавирустың андтық штаммының сегіз жағдайын растады

13 мамырда Дүниежүзілік денсаулық сақтау ұйымы хантавирус тудырған 11 ауру жағдайы тіркелгенін, оның ішінде үш өлім дерегі бар екенін мәлімдеді, деп хабарлайды Orda.kz.       

Барлық жағдай Нидерландтың MV Hondius круиздік лайнерінің жолаушылары мен экипаж мүшелері арасында анықталған.

11 жағдайдың сегізі зертханалық түрде «Андес» штаммы екенін растаған. Бұл штамм басқа түрлерден ерекшелігі – адамнан адамға жұғады. Тағы екі жағдай «ықтимал» деп бағаланса, біреуі тексеріліп жатыр.

Ұйым әлем халқы үшін инфекцияның таралу қаупін әлі де төмен деп бағалайды. Алайда кеме жолаушылары мен экипажы үшін қауіп деңгейі орташа болып отыр.

Мамандардың айтуынша, андтық штамм – адамнан адамға шектеулі түрде тарай алатын жалғыз түр. Әдетте жұғу үшін тығыз әрі ұзақ байланыс қажет, ал инкубациялық кезеңі 6–8 аптаға созылады. Сонымен қатар сарапшылар бұл жағдайды COVID-19 пандемиясымен салыстыруға келмейтінін, себебі вирустың таралу әлеуеті әлдеқайда төмен екенін атап өтті.

Оқи отырыңыз:

• Алматы хантавирус жұқтырудың ықтимал жағдайларына дайын — СЭБД
• Хантавирус ошағына айналған лайнердегі жолаушылар өз елдеріне тарады
• ДДСҰ басшысы хантавирус өршіген кемені эвакуациялауды жеке бақылайды