«Бұлай болмайды!»: Сатыбалды Алматыдағы құрылыстың тоқтап тұрғанына ашуланды

Дархан Сатыбалды Алматыда мектептер, балабақшалар мен жолдардың құрылысын кешеуілдетіп жатқан жауапты мекемелерге қатаң сын айтты. Қаланың жаңа әкімі жұмысты дереу аяқтауды талап етіп, бұлай жалғаса берсе, мердігерлерді ауыстыратынын ескертті, деп хабарлайды Orda.kz.

Әкімшіліктің мәліметінше, Сатыбалдының Наурызбай ауданындағы әлеуметтік және инфрақұрылымдық жобалардың жүзеге асыру қарқынына көңілі толмаған. Ол нақты талап қойды: құрылысты күзге дейін аяқтау керек.

Құрамыс шағын ауданында 1,5 мың орындық мектеп пен 320 балаға арналған балабақшаның құрылысы өте баяу жүріп жатыр, бұл ауданда оқу орындарының тапшылығы қатты сезіледі — келесі оқу жылында шамамен бес мың орын жетіспейді. Әкім мерзімнің ұзаққа созылуын бейберекетсіздік деп атап, мұндай мердігерлермен жұмысты тоқтату қажет екенін баса айтты.

«Бұлай болмайды! Егер құрылыс мерзімі бұзылып жатқан болса, шешімді өздеріңіз қабылдап, мердігер компаниямен келісімді бұзып, оны өнім берушілердің қара  тізіміне енгізулеріңіз керек. Ал сіздер мені ертіп әкеліп, бұл — шешілмейтін мәселе дейсіздер. Ешкім сіздерге жұмыс істеуге кедергі келтіріп жатқан жоқ. Әр нысанға қатаң бақылау болу керек», — деді Сатыбалды. 

Сондай-ақ ол бір ауысымда 500 адамды қабылдай алатын емхананың құрылысын тексерді. Бұл мекеме №26 қалалық емхананың жүктемесін азайтуы тиіс. Алайда бұл жерде де — уақытша жабылған жолдар, шұңқырлар мен ұзаққа созылған құрылысты көрсеткен.

«Жоба бар. Инженерлік желілерді тартып жатырсыздар. Қаржы бөлу бойынша ешқандай мәселе жоқ. Сіздерге тек жұмысты уақытында әрі сапалы орындау ғана қалды. Жаз мезгіліндегі жол қазуға қатысты барлық істі жаңа оқу жылы басталғанға дейін аяқтау керек», — деді әкім. 

Ақжар шағын ауданында 82 шақырымдық су және кәріз желілерін тарту жұмыстары жалғасуда. Мұнда жұмыс жүріп жатқаны байқалады — 31 шақырым су құбыры мен 27 шақырым кәріз жүйесі төселген. Дегенмен, құрылысты тек 2025 жылдың соңына дейін аяқтау жоспарланған. Бұл — күрмеуі шешілмей келе жатқан ескі мәселе, ал ауыз сумен әлі де барлық тұрғын қамтамасыз етілмеген.

Сатыбалды сондай-ақ Абылай хан даңғылының қайта жаңғыртылуына байланысты тапсырма берді — 5,3 шақырым жолдың 4,7 шақырымы аяқталған. Жуырда тағы 600 метр жол пайдалануға берілді. Жобаны 2025 жылдың қарашасында аяқтау көзделіп отыр. Ал қаладағы жолдардың  орташа жөндеуге  қарап тұрған жерлерін әкім 2025 жылдың қазанына дейін бітіруді талап етті.

Бақылауға №7 қалалық клиникалық аурухана да алынды. Мұнда 15 жылдан бері алғаш рет күрделі жөндеу басталған. Инженерлік жүйелер тозған, шатырдан су ағады, лифтер ескірген. Сатыбалды жөндеу жұмыстарының мерзімі мен сапа стандарттарының қатаң сақталуын талап етті.

Мердігерлердің әкім қойған талаптарын қаншалықты орындайтыны тек күзде белгілі болады. Әзірге ұзаққа созылған құрылысты сырттай ғана  бақылауға тура келеді.

2025 жылғы 24 мамырда Қасым-Жомарт Тоқаевтың жарлығымен Дархан Сатыбалды Алматы қаласының әкімі болып тағайындалады. 

Алматының жаңа әкім Дархан Сатыбалдының кім екені, қайдан келгені, бұған дейін не тындырғаны туралы осы жерден оқыңыз.

Алматы қаласының жаңа әкімінің келе сала қандай уәде бергені туралы білгіңіз келсе, тілші материалын қараңыз.