Бұрынғы әйелінің бетіне қышқыл шашып күйдіріп, қашып кеткен адам ұсталды

Шымкентте әйелдің  бұрынғы күйеуі оның бетіне қышқыл шашып, күйдіріп, қашып кеткен. Оның осы шабуылынан кейін әйел ауруханаға түсті. Ал күдікті Алматыда ұсталды, деп хабарлайды Orda.kz.       

Алдын ала мәлімет бойынша, ерлі-зайыпты шамамен бес жыл бұрын ажырасқан. Олардың ортақ баласы бар. Жәбірленуші сұлулық салонында жұмыс істейді.

Әйел қызын дүниеге әкелгеннен кейін, шамамен бес жыл бұрын бұрынғы күйеуімен ажырасқан. Кейін ол алимент өндіруге өтініш берген. Алайда төлем тұрақты түспей, айына шамамен 10 мың теңге ғана жіберіліп отырған.

Бірнеше жылдан кейін бұрынғы күйеуі қайта пайда болған. Ол әйелдің есігін бұзып кірмек болып, жанжал шығарған және одан алименттен нотариус арқылы бас тартуды талап еткен. Құқық қорғаушылардың мәліметінше, шабуыл алдында ер адам жаңа телефон нөмірін сатып алып, өзін клиент ретінде таныстырып, бұрынғы әйеліне хабарласқан.  Ер адам одан түнде шұғыл сұлулық салонында  қабылдауды сұрап, жақын арада демалысқа шығатынын айтқан.

Ол арнайы киім киіп, қолына канистр ұстап алған. Бұталардың арасынан шығып, әйелдің қолынан ұстап, үстінен сұйықтық құйған. Ол айқайлағанда адамдар көмекке келген. Ал ер адам қашып кеткен.

Жәбірленуші қазір ауруханада жатыр. «НеМолчи» қорының мәліметінше, әйелдің бетіне, мойнына, қолына, кеудесіне, иығына және арқасының бір бөлігіне зақым келген. Оған тері алмастырып, бірнеше операция жасау қажет болуы мүмкін.

Полиция департаментінің мәліметінше, аталған факті бойынша қылмыстық іс қозғалып, күдікті қамауға алынған.

«Күдіктінің кім екені сол күні анықталып, Алматы қаласында ұсталды», – деп хабарлады полиция. 

Алдын ала болжам бойынша, жанжалға қаржылық мәселелер, оның ішінде несие мен алимент төлеу мәселесі себеп болған.

Ер адам ұсталды. Оқиғаға қатысты Қаратау аудандық полиция басқармасы Қазақстан Республикасы Қылмыстық кодексінің 107-бабы бойынша тергеу жүргізіп жатыр. Бұл бап бойынша үш жылға дейін бас бостандығынан айыру жазасы қарастырылған.

Оқи отырыңыз:

• Күннің толық тұтылуы: Астрономиялық құбылысты бірнеше ел тамашалады
• Науқас отадан кейін ішінде қалған дәкемен екі ай қиналып жүрген