Бозжыра шатқалының қарау алаңына апаратын автомобиль жолы салынады

Бозжыра шатқалына және оған қатысты аумаққа  автомобиль жолдарын салуға жобалау-сметалық құжаттаманы (ЖСҚ) әзірлеу жөніндегі конкурс  нәтижелері жарияланды, деп хабарлады инАқтау.

Облысқа қарасты Қарақия аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімі осындай жобалау-сметалық құжаттамаға тапсырыс берген.

Бозжыраның қарау алаңына дейін автомобиль жолын салуға  ЖСҚ әзірлеуге  - 18,5 миллион теңге, шатқалға жол салу бойынша - 23,2 миллион теңге қарастырылған. Бұл құжаттаманы дайындауға жұмсауға қажет қаражат, аталған сома конкурстан кейін де өзгеріссіз қалды.

Конкурс бойынша  екі жобалауды  да жергілікті «Жобалау Орталығы» ЖШС жеңіп алды.

Естеріңзде болса, бұған дейін қазақстандықтар мен табиғат қорғаушылар әлеуметтік желілерде Бозжыра қорығында қонақүй салуға қарсы болып, наразылықтарын білдірген болатын.

Кейін Президент үкіметке қонақүй салу жобасын қайта қарауды тапсырған. Ол қонақ үй салуға арналған қоғамдық кеңестердің, экологиялық сарапшылардың және мемлекеттік ведомстволардың келісілген пікірін ескере отырып, таңдау жасау керектігін айтқан болатын.

Осы орайда Маңғыстау облысының зиялы қауым өкілдері Қасым-Жомарт Тоқаевқа Бозжыра аумағындағы, бұған дейін халық арасында дау тудырған жаңа туризм жобаларын қолдайтындықтарын айтып хат жазған.