«Бойка немесе Цистерон». Қырғызстанда ақсақал жылқыларға шетелдік лақап ат бермеуді сұраған

Қырғызстанның Ош облысындағы Алайқу аңғары тұрғындарымен өткен кездесуде жергілікті тұрғындардың бірі жылқы иелерінің сәйгүліктеріне қырғызша ат қою дәстүрінен алыстап бара жатқанына алаңдаушылық білдірді, деп хабарлайды Orda.kz. 

Президенттің Ош облысындағы өкілетті өкілі Аманқан Кенжебаевпен кездесу барысында ол бұл мәселені көтеріп, ұлттық болмысты сақтаудың маңызын атап өтті.

«Бізде көкбөрі ойыншылары да, жылқы баптайтын азаматтар да бар. Бірақ неге екені белгісіз, олар аттарына қырғызша ат қоймайды. Оларға Манастың 40 шорасының есімдерін беруге болар еді. Оның орнына Бойка немесе Цистерон сияқты аттар қойылып жүр. Егер жылқыларға қырғызша ат қойсақ, ұлттық болмысымызды сақтауға үлес қосар едік», — деді тұрғын. 

Өз кезегінде Аманқан Кенжебаев алдымен жылқылардың емес, балалардың есіміне назар аудару қажет екенін айтты.

«Әзірге жылқыларды қоя тұрайық. Одан да балаларымыз бен немерелерімізге қырғызша есім беруді неге доғарғанымыз туралы ойланайық. Қайда бара жатқанымызды өзім де түсінбеймін», — деді ол.

Оқи отырыңыз: 

• Зейнеткер өз қызын сотқа беріп, алиментін бет күтіміне жұмсамақ болған
• Әл-Фарабидегі жол апаты: Сотта жаңа жәбірленуші пайда болды