«Біреуінің бауыры езіліп, үш бала қашып кеткен»: Райымбек ауданындағы қайғылы апатқа байланысты жаңа деректер шықты

Алматы облысының Райымбек ауданында алты жасөспірім мінген көлік жол апатына ұшырап, 16 жастағы қыз қаза тапты. Төрт жасөспірім ауруханаға жеткізілді. Orda.kz редакциясына жәсөспірімдердің туыстары сұхбат беріп оқиғаның мән-жайын айтып берді. 

Еске салар болсақ, Алматы облысының Райымбек ауданында кәмелетке толмағандар отырған көлік аударылып, 16 жастағы қыз қаза тапты. Жол-көлік оқиғасы 17 тамызда сағат 04:20 шамасында «Сарыжаз–Қарасаз» жолының 5-шақырымында Сарыжаз ауылынан шамамен 12 шақырым жерде болған.

Ата-аналардың айтуынша, жасөспірімдер Қарасаз ауылына бара жатқан. Жолға шығып кеткен жылқылардан қашқан кезде көлік аударылған деген болжам бар.

Қаза тапқан қыз алты жасөспірімнің бірі болған. Оның құрбысының анасы қыздың отбасында жалғыз бала болғанын айтты.

«Аяқ-қолы сынса да аман болса екен деп ішіміз қан жылап жүр», – дейді зардап шеккен жасөспірімдердің бірінің анасы.

Ата-аналардың сөзінше, 16 жастағы жасөспірім нағашы ағасының көлігін рұқсатсыз алып кеткен. Иесі оның көлікті мінгенін білмеген. Жол апатынан кейін бес жасөспірім Райымбек аудандық ауруханасына жеткізілген. Бір бала жансақтау бөлімінде жатыр, қалған төртеуінің жағдайы тұрақты.

«Бес бала жеткізілді. Біреуі жедел жәрдем жеткенге дейін қайтыс болды. Төрт жасөспірімнің жағдайы тұрақты», – дейді «Райымбек аудандық ауруханасы» КМК директоры.

Orda.kz редакциясы дереккөзінің мәліметінше араларындағы бір жасөспірімнің жағдайы ауыр, бауыры езіліп кеткен. Жағдайы ауыр деп бағаланып отырған жасөспірім Алматы облысы балалар ауруханасына ауыстырылды.

Жасөспірімдер түнгі уақытта Қарасаз ауылындағы тәулік бойы жұмыс істейтін дүкенге бармақ болған. Алдын ала ақпаратқа сәйкес, көлікті басқарған жасөспірім жылдамдықты арттырып, телефонға қараған сәтте рөлге ие бола алмай қалған.

Дереккөздің айтуынша, жол апаты кезінде қаза тапқан қыз көліктің астында қалып, ауыр жарақат алған. Оқиғадан кейін жасөспірімдердің үшеуі қорқып, оқиға орнынан кетіп қалған деген ақпарат бар. Бұл мәліметтерді редакция әзірге тәуелсіз түрде растай алған жоқ.

Оқиғаның нақты себептері мен жасөспірімдердің көлікке қалай отырғаны әзірге анықталып жатыр. Алматы облысының полиция департаменті әзірге ресми түсініктеме берген жоқ.

Оқи отырыңыз: 

• Башар Асадтың бауыры Сирияда өлім жазасына кесілді
• Солтүстік Арал қайта толып келеді: Су дипломатиясы теңіз тағдырын өзгертті