Бір палаталы парламентке көшу: Тоқаев екі маңызды заңға қол қойды

Мемлекет басшысы Қасым-Жомарт Тоқаев прокуратураның жұмысы мен сайлау органдарының қызметіне өзгерістер енгізетін екі жаңа заңға қол қойды, деп хабарлайды Orda.kz.       

Атап айтқанда, президент «Қазақстан Республикасының Конституциясына сәйкестендіру, сайлау және прокуратура туралы заңнаманы жетілдіру мәселелері бойынша кейбір конституциялық заңдарға өзгерістер мен толықтырулар енгізу туралы» конституциялық заңға қол қойды.

Сонымен қатар «Қазақстан Республикасының Қылмыстық, Қылмыстық-процестік, Қылмыстық-атқару кодекстеріне және Әкімшілік құқық бұзушылық туралы кодексіне Конституцияға сәйкестендіру, сайлау және прокуратура туралы заңнаманы жетілдіру мәселелері бойынша өзгерістер мен толықтырулар енгізу туралы» заң да бекітілді.

Қазақстан Парламентінің Сенаты мәліметінше, қабылданған заңдар жаңа Конституцияны іске асыруға бағытталған кешенді түзетулерді қамтиды.

Сенат төрағасы Мәулен Әшімбаев бұл өзгерістер мемлекеттік биліктің жаңа институттарын қалыптастыруға және сайлау процесінің рәсімдерін нақтылауға байланысты екенін айтты. Сонымен қатар инвесторлардың құқықтарын қорғау саласында прокуратураның рөлі күшейтіледі: Бас прокурорға инвестициялық омбудсмен өкілеттігі беріледі.

Бұдан бөлек, бірмандатты округтен сайланған мәслихат депутатын кері шақырып алу жағдайында оның өкілеттігін мерзімінен бұрын тоқтату тәртібі де реттелді.

Қосымша түзетулерге сәйкес, өңірлік деңгейде инвестициялық омбудсмен функциясын облыс прокурорлары, сондай-ақ республикалық маңызы бар қалалар мен астана прокурорлары атқарады. Ал активтерді қайтару жөніндегі уәкілетті орган ретінде Бас прокуратура айқындалды.

Жалпы алғанда, бұл заңдар пакеті конституциялық нормаларды тиімді әрі сапалы жүзеге асыруға бағытталған.

Оқи отырыңыз:

• Тоқаев бірқатар Конституциялық заңға қол қойды
• Еліміздегі «Aманат» пен «Әділет» партиялары біріге ме?
• Құрылыс кодексі: Әкімдіктер заңсыз құрылысты анықтауға міндетті