Бекет ата мешітіне зияратқа аттанып, хабарсыз кеткен үш адам табылды

Маңғыстау облысының Бейнеу ауданында жоғалып кеткен тұрғындар аман-есен табылды. Маңғыстау облыстық полиция департаменті мәліметінше, олардың автокөлігі Қыдырша ата аумағынан шамамен 35 шақырым жерде қалған, деп хабарлайды Orda.kz.       

Көлік батпақты жерге батып қалып, адамдар әрі қарай қозғала алмай, байланысқа шыға алмай, жолда қалған, деп хабарлады Lada.kz.

Алдын ала мәлімет бойынша, көлік батпаққа батып қалғандықтан, ішіндегі адамдар өздігінен шыға алмай, туыстарымен де, жедел қызметпен де хабарласа алмаған.

Жоғалғандарды алғаш болып Бейнеу аудандық полиция бөлімінің қызметкерлері — учаскелік полиция инспекторы, капитан Нұржігіт Базарбаев және әкімшілік полиция бөлімінің аға инспекторы, майор Бауыржан Нұрмұханбетов тапқан.

Қазіргі уақытта табылған азаматтар Ақжігіт ауылына жеткізілді. Онда олардың денсаулық жағдайын білу үшін медициналық тексеру жүргізіледі.

Полиция департаменті іздестіру жұмыстарына қатысқан барлық азаматтарға алғыс білдірді.

«Полиция қызметкерлері, ТЖД бөлімшелері және басқа да қызметтердің үйлесімді әрі жедел әрекеті арқасында іздестіру жұмыстары сәтті аяқталды»,  деп хабарлады ведомство. 

Еске сала кетейік, Маңғыстауда Бекет ата жерасты мешітіне зиярат етуге кеткен үш адам ізім-ғайым жоғалып кеткен еді. Кейін Ақтау қалалық полиция басқармасы криминалдық полиция бөлімі Ақтау қаласында Бекет ата мешітіне барғаннан кейін байланысқа шықпай қалған үш адамға іздеу жариялаған болатын.

Оқи отырыңыз:

• Маңғыстауда Бекет ата жерасты мешітіне зиярат етуге кеткен үш адам ізім-ғайым жоғалып кетті
• Мүфтият мәһрдің ең төменгі мөлшерін түсіндірді
• Таразда жер сілкінісі сезілді