Маңғыстауда Бекет ата жерасты мешітіне зиярат етуге кеткен үш адам ізім-ғайым жоғалып кетті

Маңғыстау облысының үш тұрғыны 2 шілде күні автокөлікпен Бекет ата жерасты мешітіне бет алған. Сол күні олармен байланыс үзіліп, содан бері қайда екені белгісіз. Полиция іздеу жариялап, ауқымды іздестіру жұмыстарына құтқарушылар, «Охотзоопром» мамандары, тікұшақтар мен арнайы техника тартылды, деп хабарлайды Orda.kz.

Маңғыстау тұрғыны әлеуметтік желіде жоғалған туыстарының орналасқан жері туралы қандай да бір ақпарат білетін азаматтардан көмек сұраған.

Кейін Ақтау қалалық полиция басқармасы криминалдық полиция бөлімі Ақтау қаласында Бекет ата мешітіне барғаннан кейін байланысқа шықпай қалған үш адамға іздеу жариялады.

Полиция мәліметінше, 2 шілде күні шамамен сағат 16:15-те Great Wall автокөлігімен мешітке қарай жолға шыққандар:

• Қанатбек Жұбатқанов — Мұнайлы ауданы, Атамекен ауылының тұрғыны;
• Ақмарал Бисенова — Атамекен ауылының тұрғыны;
• Мархабат Бисенова — Ақтау қаласының тұрғыны.

Белгілі болғандай, зияратшылар соңғы рет сапарға шыққан күні байланысқа шыққан. Олар WhatsApp арқылы Бекет ата жерасты мешіті аумағынан түсірілген бейнежазба жіберген, содан кейін байланыс үзілген. Содан бері олардың нақты қайда екені белгісіз.

Маңғыстау облыстық полиция департаменті 5 шілде күні таңертең іздеу жұмыстарының жалғасып жатқанын хабарлады.

«Қазіргі уақытта ауқымды іздестіру шаралары жүргізілуде. Жоғалғандарды табу үшін полиция қызметкерлері, ТЖД бөлімшелері, Охотзоопром мамандары және басқа да жедел қызметтер жұмылдырылды»,  деп мәлімдеді ведомство. 

Ресми ақпаратқа сәйкес, іздеу жұмыстарына тікұшақтар, арнайы техника және қажетті құрал-жабдықтар тартылған. Іздеу бірнеше бағытта қатар жүргізілуде.

«Барлық қызмет күшейтілген режимде жұмыс істеп, жоғалған азаматтардың орналасқан жерін тезірек анықтау үшін барлық шараларды қабылдауда» деп атап өтті полиция. 

Іздестіру жұмыстары жалғасуда. Полиция өңір тұрғындарынан жоғалғандардың қайда болуы мүмкін екені туралы кез келген ақпаратты хабарлауды сұрайды.

Оқи отырыңыз:

• «Төлемесең — масқараңды шығарамын»: Шымкентте мемлекеттік қызметкерлерді бопсалады деген күдікпен блогер ұсталды
• 17 жастағы Алдияр Аңсат жаңа гроссмейстер атанды
• Президент Қазақстан халқын Ұлттық Домбыра күнімен құттықтады