Бас прокурор: Шетелдегі 12 алаяқтық байланыс орталығынан түскен миллионнан астам қоңырау тоқтатылды

Қазақстанның Бас прокуроры Берік Асылов елдегі алаяқтық және басқа да құқық бұзушылықтардың алдын алу бағытында жүргізіліп жатқан ауқымды жұмыстар туралы мәлімдеді, деп хабарлайды Orda.kz.       

Бас прокурор Берік Асылов әлеуметтік желідегі  парақшасында Қазақстандағы алаяқтықпен және өзге де құқық бұзушылықтармен күрес нәтижелері туралы жазды.

Оның айтуынша, елде жаңа Конституция қабылданғаннан кейін жүргізіліп жатқан ауқымды құқықтық реформа аясында құқық қорғау органдарының жұмыс тәсілдері де өзгеріп жатыр.

«Бүгінде жасалған қылмысқа әрекет етумен шектелу жеткіліксіз. Біздің ортақ міндетіміз – қауіп-қатердің алдын алу, құқық бұзушылықтарға себеп болатын жағдайларды жою және азаматтардың құқықтарын нақты қорғауды қамтамасыз ету», – деді Берік Асылов. 

Осы мақсатта Қылмыстық қауіп-қатерлер мен қоғамдық қауіпсіздік тәуекелдерін болжау орталығы құрылған. Бас прокурордың айтуынша, бұл орталық қылмыстың салдарымен күресуден оның алдын алуға көшуге мүмкіндік беретін негізгі құралдардың біріне айналған.

Орталық тәулік бойы қылмыстық ахуалды талдап, ықтимал қауіптер мен осал аймақтарды анықтайды, тәуекелдерді болжайды және олардың алдын алу бойынша нақты шаралар әзірлейді.

Сонымен қатар шетелдік ақпарат кеңістігіне мониторинг жүргізіліп, қылмыстық қауіптердің жаңа түрлері мен тәсілдері анықталады.

Бұл талдау жергілікті жерлерде нақты шешім қабылдауға негіз болады. Мәселен, Ішкі істер министрлігі және өңір әкімдіктерімен бірлесіп, жасанды интеллект пен ұшқышсыз технологияларды пайдалану арқылы азаматтарға қарсы қылмыс жасалуы ықтимал 360-тан астам қауіпті орынды анықтаған.

Бұл жерлерде полиция патрульдері күшейтіліп, 4 мыңға жуық жаңа жарықтандыру нүктесі және 3,5 мыңнан астам бейнебақылау камерасы орнатылған.

«Бұл тәсіл қазірдің өзінде нәтиже беріп отыр. Бірінші жартыжылдықтың қорытындысы бойынша елдегі қылмыс деңгейі 11 пайызға төмендеді. Адам өлтіру, қарақшылық, тонау, бопсалау, ұрлық және көшеде жасалатын қылмыстар саны азайды», – деді Бас прокурор. 

Есірткі қылмысына да бақылау күшейді. Қазақстанда есірткі қылмысына қарсы күрес жүйелі жалғасып жатыр. «Кибернадзор» жүйесі есірткіні насихаттау белгілері бар 10 мың материалды, оның ішінде 6 мыңнан астам есірткі сататын интернет-дүкенді бұғаттаған.

Прокуратура мен полицияның бірлескен жұмысы нәтижесінде 464 мыңнан астам дропперлік шот бұғатталып, есірткі қылмысынан түскен 2,6 млрд теңгеден астам кіріске тыйым салынды.

Интернет-алаяқтық 9 пайызға азайды. Берік Асылов соңғы жылдары алғаш рет интернет-алаяқтықтың өсу үрдісін тоқтатуға қол жеткізілгенін айтты. Оның мәліметінше, интернет арқылы жасалатын алаяқтық қылмыстардың саны 9 пайызға төмендеген.

Бас прокурор елордада прокуратураның бастамасымен байланыс операторы базасында құрылған Антиколл-орталықтың жұмысын мысалға келтірді. Орталық алаяқтардың 76 жастағы әйелге қоңырау шалғанын,  ол 21 млн теңгені беруге дайындалып тұрған сәтте анықтап, қоңырауды тоқтатқан. Нәтижесінде әйелдің ақшасы өзінде қалды.

«Біздің мақсатымыз — қауіптің қылмысқа айналуын күтпей, оны алдын ала анықтау, себептерін жою және салдарының алдын алу. Конституциялық «Заң мен тәртіп» қағидатын іс жүзінде жүзеге асыру дегеніміз —осы. Мемлекет басшысы Қасым-Жомарт Тоқаев алдымызға дәл осындай міндет қойып отыр» деп жазды бас прокурор. 

Осылайша, Қазақстанда алаяқтықпен күрес тек қылмыс жасалғаннан кейін әрекет етуге емес, күдікті қоңырауларды алдын ала анықтау, қауіпті орындарды болжау, заңсыз қаржы операцияларын бұғаттау және азаматтарды қылмыс құрбаны болудан қорғауға бағытталып отыр.

Оқи отырыңыз:

• Қазақстанда интернет-алаяқтық 25%-ға артты
• Интернет-алаяқтыққа қарсы конституциялық кепілдік қажет — Жақып Асанов
• Алматының қай жерлері қауіпті? Полиция қылмыс картасын өзгертіп жатыр