БАҚ: Алматы облысында полиция бастығының орынбасары әйелін қызметтік көлікпен қағып өлтірді

Алматы облысының Балқаш ауданында адам өліміне әкелген жол апаты тергеліп жатыр, деп хабарлайды Orda.kz.

Polites News мәліметінше, іс бойынша аудандық полиция бөлімі бастығының орынбасары Бауыржан Қабдұлданов тергеліп жатыр. Алдын ала ақпаратқа сәйкес, қайғылы оқиға 2026 жылғы 16 мамыр күні шамамен сағат 05:04-те Қонаев – Бақанас тасжолында болған.

Оқиға туралы хабар Балқаш аудандық полиция бөлімінің кезекші бөліміне түскен. Оқиға орнына аудан прокуроры, оның орынбасары, кезекші прокурор және Алматы облысы полиция департаментінің жедел-тергеу тобы барған.

Алдын ала тексеру мәліметінше, Балқаш аудандық полиция бөлімі бастығының орынбасары қызметтік Hyundai Elantra автокөлігін басқарған. Көлікте оның жұбайы да болған. Жүргізушінің алғашқы түсініктемесіне сәйкес, Бақанас ауылы бағытына кетіп бара жатқанда ерлі-зайыптылар арасында жанжал шыққан. Ер адам әйелінің көліктің есігін ашып, түсіп кетпек болғанын айтқан.

Осыдан кейін оның сөзінше, ол Бақбақты ауылы маңында көлікті тоқтатып, әйелін түсіріп кеткен де, жолын жалғастырған. Шамамен 2–3 шақырым жүрген соң, оны қайта алып кету үшін кері бұрылғаны айтылады.

Алдын ала нұсқа бойынша, әйел Қонаев – Бақанас тасжолының 84-шақырымында жол ортасында отырған күйде қалған. Жүргізуші оны байқамай қалып, қағып кеткенін мәлімдеген. Алған жарақаттарынан әйел оқиға орнында көз жұмды.

Тергеу мәліметінше, жәбірленушінің жолда болғаны оқиға орнын қарау нәтижелерімен, қан іздерімен және мәйітті тексеру қорытындыларымен алдын ала расталып отыр.Сондай-ақ Қабдұлдановтың қызметтік көлікті жол парағы негізінде басқарғаны хабарланды. Бұған дейін, 15 мамыр күні ол полиция бөліміндегі қылмыстық істер бойынша сараптамалар тағайындау үшін Қонаев қаласына барған.

Аталған факт ҚР ҚК-нің 345-бабы 3-бөлігі бойынша — жол қозғалысы ережелерін немесе көлік құралдарын пайдалану қағидаларын бұзу, абайсызда адам өліміне әкеп соғу дерегімен сотқа дейінгі тергеп-тексерудің бірыңғай тізіліміне тіркелді. Қызметтік автокөліктің алдыңғы бампері зақымданып, радиаторы ішке қарай майысқан.

Оқи отырыңыз:

• Атырауда қайын жұртын қырып тастаған Сұлтан Сәрсемалиевке қатысты сот процесі басталды
• Куба дәл Иран сияқты енді АҚШ-қа қарсы әскери әрекеттерге дайындалып жатыр