Куба дәл Иран сияқты енді АҚШ-қа қарсы әскери әрекеттерге дайындалып жатыр

Куба АҚШ-пен жаңа текетіреске дайындалып жатыр ма? Кариб теңізінде дрон соғысының көлеңкесі пайда болды, деп хабарлайды Orda.kz.

Axios басылымының мәліметінше, Гавана 300-ден астам әскери дрон сатып алып, оларды америкалық нысандарға қарсы қолдану сценарийлерін талқылай бастаған.

Әңгіме тек барлау жүргізетін аппараттар жайлы емес. Сөз соққы жасауға қабілетті әскери дрондар туралы болып отыр. Басылым дерегіне сәйкес, ықтимал нысаналардың ішінде АҚШ-тың Кубадағы әйгілі Гуантанамо әскери базасы, америкалық әскери кемелер және тіпті Флоридадағы Ки-Уэст қаласы да бар.

Ки-Уэст пен Гавана арасын небәрі 150 шақырым ғана бөліп тұр. Дрон технологиясы дамыған қазіргі кезеңде бұл қашықтық әскери тұрғыдан аса үлкен кедергі саналмайды.

Бұл жағдайдың символдық салмағы да ауыр. Өйткені дәл осы Куба ХХ ғасырда әлемді ядролық соғыс қаупіне тіреген Кариб дағдарысы орталығына айналған еді. 1962 жылы Кеңес Одағы аралға ядролық зымыран орналастырғаннан кейін, АҚШ пен КСРО тарихтағы ең қауіпті геосаяси текетірестердің біріне кірген болатын.

Енді арада алпыс жылдан астам уақыт өткенде, Куба қайтадан Вашингтон үшін әскери қауіп ретінде қарастырыла бастады.

Axios мәліметінше, Гавана биыл көктемде Ресейден қосымша дрондар мен әскери техника сұраған. Бұл тұста Украинадағы соғыс маңызды факторға айналып отыр. Себебі соңғы жылдары FPV-дрондардың салыстырмалы түрде арзан бола тұра, қымбат әскери техника мен инфрақұрылымды істен шығара алатыны дәлелденді.

Сарапшылардың пікірінше, дәл осы себептен АҚШ әкімшілігі Кубаның қарулануын жай ғана саяси риторика ретінде қабылдамайды.

Оқиғаның тағы бір қызық тұсы — Бас барлау басқармасының директоры Джон Рэтклиффтің Кубаға шұғыл сапары. Axios мәліметінше, ол Гавана билігіне өте қатаң ескерту жасаған: Куба енді «АҚШ-қа қарсы күштердің Батыс жартышардағы платформасына айнала алмайды» деген. Вашингтон тілімен айтқанда, бұл — ашық дипломатиялық қысым.

АҚШ ішінде бұл мәселеге қатысты екі түрлі көзқарас қалыптасып отыр. Бір тарап Кубаның әскери белсенділігін ұлттық қауіпсіздікке тікелей қатер деп есептейді. Ал екінші тарап мұндай ақпараттар кейінгі қысымға немесе ықтимал әскери әрекеттерге негіз дайындау үшін қолданылуы мүмкін деп санайды. Себебі АҚШ тарихында Латын Америкасындағы араласулар алдында «қауіп факторы» бірнеше рет негізгі аргумент ретінде пайдаланылған.

Оқи отырыңыз:

• АҚШ пен Иран келіссөзді қайта бастау үшін тағы да бір-біріне талап қойды
• Ақтөбелік емші Динара Сәтжан мен Баян Алагөзоваға тиісіп, істі болды