Бадам өзенінен тас ұрлағандарға қылмыстық іс қозғалып, тергеу басталды

Шымкентте толаcсыз жауған жаңбыр мен қар суы жуырда жөнделген бөгеттен асып кетті. Құны 2,7 млрд теңге тұратын қоршау құрылысын жергілікті билік желтоқсан айында ғана аяқтаған. Алайда, ол көктем түгілі ақпандағы тасқынға тосқауыл бола алмады, деп хабарлайды Orda.kz.       

Бұған жөнделген бөгеттің сапасыздығы емес, белгісіз адамдардың сұғанақтығы себеп дейді жауаптылар. Себебі Бадам өзеніндегі қоршау маңын әлдебіреулер қазып, сол арадан заңсыз тас ұрлаған. Тосқауыл болатын тасы жоқ бөгетті су шайып жіберген.

Шымкент қаласы қалалық жайлы ортаны дамыту басқармасының басшысы  Оңғар Әбілқайыр қазір тас ұрлап тасығандарға қатысты қылмыстық іс қозғалып, тергеу басталғанын мәлімдеді. 

«Бетондалған аумақтың 9 және 10 пикет (бір шақырымды теңдей бөлгендегі 100 метрлік аралық — ред.) аралығында 40 метр болатын бетон қабаты бүлінген. Белгісіз азаматтар заңсыз кіріп, тас алған.  Қазіргі уақытта мердігер мекеме тарапынан бүлінген бетон қабатын қайта қалпына келтіру жұмыстары басталды. Адамдардың өмірі мен денсаулығына ешқандай қауіп жоқ», — дейді ол. 

Сонымен қатар басқарма басшысы қираған қоршау қарқынды түрде реттеліп жатыр деп сендірді. 

Авторы: Назерке Еркінбекқызы, Шымкент

Оқи отырыңыз:

• Тоқаев UAE SWAT Challenge-2026 турнирі жеңімпаздарын марапаттады
• Абзал Әжіғалиев пен Денис Никиша Олимпиада ойындарының ширек финалына жолдама алды
• Қазақстан McDonald’s желісін етпен қамтамасыз ете алмады