БАӘ-де қайтыс болған екі қазақстандық қызға қатысты не белгілі?

Қазақстандық әпкелі-сіңлілі қыздар Біріккен Араб Әмірліктерінде қаза тапты. Ақжан мен Жұлдыз Боханованың құрбысы Балнұр жағымсыз пікірлерге жауап берді, деп хабарлайды Orda.kz.

Естеріңізге салар болсақ, қыздар Шарджға жұмыс істеу үшін барған. Таныстарының мәліметінше, олар сұлулық салонында еңбек еткен.

Әпкелі-сіңлілі қыздар шамамен бір апта бойы байланысқа шықпаған. Кейін туыстарына олардың қаза болғаны туралы хабар жеткен. Отбасы қыздардың денелерін елге жеткізу үшін тиісті көмек сұрады.

Сыртқы істер министрлігінің мәліметінше, Қазақстанның Дубайдағы Бас консулдығы марқұмдардың туыстарына қажетті құжаттарды рәсімдеуге көмектесіп, БАӘ билігімен байланыс орнатқан.

Осы уақытта әлеуметтік желілерде қыздардың өліміне қатысты түрлі қауесет тарап жатыр. Құрбыларының бірі бұл сөздерге қатысты пікір білдірді.

«Қазір соңғы жаңалықтардың астында құрбым Ақжан мен сіңлісі Жұлдыз туралы түрлі қауесеттер тарап жатқанын көріп отырмыз. «Күнкөріс үшін кетті», «жоқшылықтан кетті», «салонда емес, басқа жерде жұмыс істеген шығар» деген сияқты ешқандай дәлелі жоқ, орынсыз әрі ауыр сөздер айтылып жатыр. Екі қыздың артынан жала жауып, түрлі қауесет таратуды доғаруларыңызды сұраймыз. Ақжан мен Жұлдыз тәрбиелі, өнегелі отбасынан шыққан, білімді қыздар еді. Екеуі де мектепті «Алтын белгімен» бітірген» деп жазды қыздардың құрбысы.

Оның айтуынша, Ақжан мен Жұлдыздың болашаққа қойған мақсаттары айқын болған.

«Алға қойған мақсаттары айқын, болашаққа деген арманы мен талпынысы зор, көздерінен өмірге деген құштарлығы көрініп тұратын қыздар еді. Астана қаласында өз еңбектерімен салондарын ашып, маңдай терімен жұмыс істеді. Құрбым Ақжан 18-19 жасынан бастап өз салонында еңбек етіп, кәсібін дамытуға тырысты. Дубайға да уақытша барып, тәжірибе жинап, жаңа ел көріп, дамып, алға қойған мақсаттарына жетудің бір жолы ретінде таңдаған еді. Олар ешкімге зияны тимейтін, адал еңбегімен өмір сүріп жүрген қыздар болды», – деді ол.

Оқи отырыңыз:

Талғарда тағы бір қылмыс: Кісі өлтірді деген 56 жастағы күдікті ұсталды

Биылғы «Болашақ» стипендиясы иегерлерінің тізімі шықты