Ауладағы автотұрақты «иемденіп» алуға тыйым салынды

Енді барлық тұрғындарға ортақ үйдің ауласына бағана орнатып,  құлып салып, тосқауыл қоятындар 324 мың теңгеге дейін айыппұл төлеуі мүмкін, деп хабарлайды Orda.kz. 

2026 жылғы 1 шілдеден бастап Қазақстанда абаттандырудың жаңартылған ережелері күшіне енді. Енді аулаларда автотұрақ орындарын «брондауға» арналған кез келген құрылғыларды — шынжырлар, бағаналар немесе бөгегіштер орнатуға тыйым салынады.

Бұл талапты бұзғандарға айыппұл қарастырылған.

Krisha.kz-ке заңгер Аркадий Рубцовтың айтуынша, аула аумағы ортақ пайдаланылатын жерге жатады. Сондықтан барлық тұрғындардың ол жерде көлік қоюға тең құқығы бар. Тіпті адам жылдар бойы бір орында тұрақтаса да, нақты бір орынды өзіне бекітіп ала алмайды.

«Үй тұрғындары өзара келісіп, орындарды бөлісе алады, бірақ мұндай шешімнің заңды күші болмайды», — дейді заңгер.

Егер көршіңіз өз бетінше орынды қоршап алса, құрылғыны өзіңіз алып тастамай,  e-Otinish сервисі арқылы жер ресурстарын басқару департаментіне жүгініп, фото мен мекенжайды тіркеу қажет. Егер мамандар заңбұзушылықты растаған жағдайда, иесіне қоршауды алып тастау міндеттеледі.

Ортақ пайдаланылатын жерді өз бетінше иемденгені үшін қосымша айыппұл да қарастырылған — 75 АЕК, яғни 324,4 мың теңге.

Жеке меншіктегі автотұрақ орындары ғана бұл талаптан тыс. Мысалы, егер тұрақ орны пәтермен бірге тұрғын үй кешенінен сатып алынған болса.

Бұған дейін ҚР Өнеркәсіп және құрылыс министрлігі қалалар мен елді мекендердің аумақтарын абаттандырудың жаңартылған үлгілік қағидаларына қатысты түсініктеме берген болатын.

Атап айтқанда, онда тұрғын үйлердің жанындағы арнайы жабдықталған тұрақтарда көлік қалдыруға тыйым салатын норма жоқ екені айтылған.

Оқи отырыңыз:

• Бірнеше күннен бері 40-тан астам шетелдік турист Қырғызстандағы таудан түсе алмай отыр, қазақстандықтар да бар
• Еуропадағы ең бай адам Францияда салық төлеуден жалтарып, соттасып жатыр