Еуропадағы ең бай адам Францияда салық төлеуден жалтарып, соттасып жатыр

Француз кәсіпкері, Бернар Арно — люкс сегментіндегі LVMH компаниясының бас директоры әрі Еуропадағы ең бай адам — Францияда қосымша 22,5 миллион еуро көлемінде салық төлеуге міндеттелді, деп хабарлайды Orda.kz.        

Мұндай шешімді Париж әкімшілік соты қабылдады.

L’Informé басылымының мәліметінше, іс LVMH компаниясындағы акционерлік құрылымның «күрделі жүйесіне» байланысты. Хабарламада Арно отбасы компания капиталына тікелей иелік етпейтіні, оның орнына бірқатар холдингтік компаниялар арқылы бақылау жасайтыны айтылған. Осы құрылымның ең жоғарғы сатысында бельгиялық Pilinvest компаниясы тұр, бұл өз кезегінде Франциядағы салық көлемін азайтуға мүмкіндік берген.

Қосымша салықтық есептеу Бернар Арно мен оның жұбайының 2010–2015 жылдар аралығындағы табыстарына қатысты жүргізілген. Атап айтқанда, 2010 жыл үшін табыс салығы мен әлеуметтік төлемдер бойынша 12,96 миллион еуро және 2012–2015 жылдар аралығында мүлік салығы ретінде 9,5 миллион еуро есептелген.

2020 жылдың соңында Париждің әкімшілік соты ерлі-зайыптылардың қосымша табыс салығынан босату және мүлік салығын қайтару туралы өтінішін қанағаттандырған еді. Алайда Франция билігі бұл шешімге шағым түсірген. Қазіргі таңда Арно мен оның жұбайы істі Францияның Мемлекеттік кеңесі деңгейінде қайта қарауға ниетті.

Бернар Арно Bloomberg миллиардерлер индексінде сегізінші орында тұр. Оның байлығы шамамен 165 миллиард долларды құрайды, бұл оны Еуропадағы ең бай адам етеді.

LVMH құрамына әлемге әйгілі Louis Vuitton, Christian Dior, Moët & Chandon және Sephora сияқты брендтер кіреді.

Оқи отырыңыз:

• Қасым-Жомарт Тоқаев: Астана — ел тәуелсіздігінің символы
• Трамп өтініш жасады: FIFA тарихында алғаш рет дисквалификация жойылды