Атырауда су құбырын жөндеуден 6 млрд теңгеден асатын қаржы ұрлағандарға үкім шықты

Атырауда «Астрахань — Маңғышлақ» магистральды су құбырын қайта жаңғырту кезінде аса ірі көлемде алаяқтық жасау ісі бойынша сот процесі аяқталды, деп хабарлайды Orda.kz.       

Айыпталушылар қатарында квазимемлекеттік «Магистральдық су құбыры» кәсіпорнының («ҚазТрансОйл» компаниясының еншілес ұйымы) бұрынғы бас директоры, тапсырыс берушінің орынбасары, мердігер ұйым өкілдері және авторлық қадағалау қызметкерлері бар.

Соттың анықтауынша, қылмыстық схеманы ұйымдастырушы қызметтік өкілеттігін пайдаланып, құбырды ауыстыру бойынша тендерді жеңіп алған мердігер компанияны іс жүзінде өзі бақылаған. Ол орынбасарымен және басқа да қатысушылармен бірге жобаны заңсыз өзгертіп, кәсіпорын қаражатын жымқырған.

Айыпталушылар өз кінәларын мойындамай, ақтауды сұраған. Соған қарамастан, сот шешімімен осы істі ұйымдастырушы 6 жыл 8 айға бас бостандығынан айырылды. Тапсырыс берушінің орынбасары мен мердігер ұйымның екі қызметкері 6 жылға сотталды. Авторлық қадағалау өкілі 5 жылға бас бостандығынан айырылды.

Зардап шеккен тараптың талап-арызы ішінара қанағаттандырылды. Үкім әзірге заңды күшіне енген жоқ. Бас прокуратура мәліметінше, қайта жаңғырту барысында жалпы 6,4 млрд теңге ұрланған. Тергеу кезінде айыпталушылардың 1,1 млрд теңге көлеміндегі мүлкіне тыйым салынған.

«Астрахань — Маңғышлақ» су құбыры — Батыс Қазақстандағы маңызды су көздерінің бірі. Ол елді мекендерді, мұнай-газ кәсіпорындарын, өндірістік ұйымдарды және Атырау облысындағы индустриялық мұнай-химия технопаркін сумен қамтамасыз етеді.

Су желісі қайта жаңғырту жұмыстарынан кейін нысан 2023 жылдың желтоқсан айында пайдалануға берілген.

Оқи отырыңыз:

• «Қайта ұйымдастырылған»  антикор бір ай ішінде 17 сыбайлас жемқорлық қылмыстық іс қозғады
• Жағымпаздар «Отан» атауына «Нұр» сөзін қосып, Назарбаевты орға жықты – Бекболат Тілеухан
• «Астана» баскетбол клубы қаржыландырылмай, ойыншылар Тоқаевқа үндеу жасады