Астананың көлік жүргізушілері эвакуатор шақыру мен арнайы тұрақ ақысын өздері төлейтін болды

Сәуір айының соңынан бастап Астана қаласында жүргізушілер үшін жаңа төлемдер енгізіледі. Жол қозғалысы ережелерін бұзғандар қалтасынан қосымша қаражат шығаруы тиіс болады, деп хабарлайды Orda.kz.      

2026 жылғы 25 сәуірден бастап Астанада ұсталған көлік құралдарын эвакуациялау және сақтау ақылы болады. 2026 жылғы 19 наурызда қабылданған қалалық мәслихат шешімі қазіргі уақытта әділет органдарында тіркеуден өтіп жатыр. Қаланың көлік және жол-көлік инфрақұрылымын дамыту басқармасының мәліметінше, жақын күндері жүргізушілер эвакуатор шақыру ақысын да, арнайы тұрақта көлікті сақтау ақысын да төлеуге міндетті болады.

Қазіргі уақытта қалада көлік құралдарын уақытша сақтайтын үш алаң жұмыс істейді: «Алаш» (701 орын), «Көктал» (803 орын) және «Арғымақ» (1000 орын). Олардың жалпы сыйымдылығы — 2504 көлікке жетеді. Барлық нысандар Астана қаласының Жол қозғалысын ұйымдастыру орталығының басқаруына берілген.

Негізінде ақылы эвакуация пилоттық режимде басталып кеткен: 2026 жылғы 23 наурыздан бастап арнайы тұрақтарға 11 көлік жеткізілген, әзірге ақы алынбаған. Алайда 25 сәуірден бастап әрбір эвакуация үшін төлем енгізіледі.

Тарифтер айлық есептік көрсеткіштермен (АЕК) белгіленген және көлік санатына байланысты. Эвакуатор шақыру құны көлік түріне қарамастан 3 АЕК болады.

Бұдан кейін сақтау ақысы есептеледі:

• жеңіл автокөліктер (M1) үшін — алғашқы тәулікке 3 АЕК, кейін әр тәулікке 5 АЕК;
• 3,5 тоннаға дейінгі жүк көліктері (N1) үшін — тиісінше 5 және 7 АЕК;
• екі дөңгелекті көлік (L1, L3) — алғашқы тәулікке 1 АЕК, кейін 2 АЕК;
•  үш дөңгелекті және квадроциклдер (L2, L4–L7) — 1,5 және 3 АЕК.

Мұндағы «тәулік» ұғымы қабылдау-тапсыру актісінде көрсетілген сәттен бастап нақты 24 сағат.

Жеңілдіктер қарастырылмаған. Мәслихат шешімінде көпбалалы отбасыларға, мүгедектігі бар адамдарға және соғыс ардагерлеріне арналған жеңілдіктер жоқ, тариф тек көлік санатына байланысты. Басқарма өкілдерінің түсіндіруінше, әлеуметтік қолдау шаралары қалалық инфрақұрылымды заңды пайдалануға қатысты, ал құқықбұзушылық үшін жауапкершілік бәріне бірдей.

Көлікті қайтарып алу үшін ұсталу себебін жою және эвакуация мен сақтау ақысын толық төлеу қажет. Арнайы тұрақтар тәулік бойы жұмыс істейді. Көлікті алу үшін еркін үлгідегі өтініш, құқықбұзушылықтың жойылғанын растайтын құжаттар, жеке куәлік, көлікті тіркеу куәлігі, сенімхат (егер иесінен басқа адам келсе), төлем түбіртегі және дербес деректерді өңдеуге келісім қажет.

Сонымен қатар тұрақтардың толуы да сұрақ тудырып отыр. 2026 жылғы 14 сәуірдегі мәлімет бойынша үш алаңда 2109 көлік бар: «Арғымақта» — 588, «Алашта» — 695, «Көкталда» — 826. Яғни жалпы сыйымдылықтың 84%-ы толған. Бұл ретте уәкілетті орган талап етілмеген көліктердің орташа сақтау мерзімін және олардың нақты қойылған күндерін жариялаған жоқ, ал ақылы сақтау санаулы күннен кейін-ақ есептеле бастайды.

Астанада жол қозғалысын ұйымдастыру ережелері 2026 жылғы 20 сәуірден бастап күшіне енеді, ал эвакуация мен сақтау үшін төлемдер 25 сәуірден бастап алынады.

Оқи отырыңыз:

• Денсаулығың көтермесе - көлік жүргізбе: 1787 адамның жүргізуші құқығы жойылды
• ҚР ІІМ ескертеді: Камералар құжатсыз көлік айдағандарды анықтайды
• Полиция алматылықтардың 5 мыңға жуық көлігін айып тұрағына қойды