Астанада полиция туралы ролик түсіріп, жариялаған блогер жазаланды

Астана полициясы полиция қызметкерлерінің беделіне нұқсан келтіретін видео жариялаған ер адамның әкімшілік жауапкершілікке тартылғанын хабарлады, деп жазады Orda.kz.

Астана қаласы полиция департаментінің мәліметінше, әлеуметтік желілерді мониторингтеу барысында полицей формасын киген ер адамның жарияланымы анықталған.

«Ер адам полицияның арнайы формалық киімін пайдалана отырып, полиция қызметкерлері әрекетін қаралайтын бірқатар бейнероликтер жариялаған.
Тексеру барысында 30 жастағы құқық бұзушы анықталып, полиция бөліміне жеткізілді. Аталған дерек бойынша ол арнайы айырым белгілері бар киімді заңсыз кигені үшін, сондай-ақ құқыққа қайшы контент орналастырып, таратқаны үшін әкімшілік жауапкершілікке тартылды», деп хабарлады департамент. 

Іс материалдары тиісті шешім қабылдау үшін сотқа жолданғаны айтылды.

Астана қаласының полиция департаменті құқық қорғау органдарының формасын, рәміздерін заңсыз пайдалану, сондай-ақ полиция қызметкерлерінің беделін түсіруге бағытталған және азаматтарды жаңылыстыратын материалдарды тарату әрекеттері дереу анықталып, заң аясында қатаң бағаланатынын атап өтті.

«Интернет кеңістігін бақылау тұрақты түрде жүргізіледі. Мұндай құқықбұзушылықтар үшін жазаның бұлтартпастығы Қазақстан Республикасының заңнамасына сәйкес қамтамасыз етіледі», деп мәлімдеді ведомство. 

Полиция жариялаған бейнежазбаға қарағанда, әңгіме justiceadilet лақап атымен танымал блогер туралы болуы мүмкін.

Оқи отырыңыз:

• Әкімшілік амнистия: 300 миллион теңгеге жуық айыппұл кешіріледі
• АҚШ елшілігі: Сұхбат қазақ тілінде өтіп, 10 жылдық виза беріледі
• Паттайяда туристің шабаданынан 17 жастағы қыздың мәйіті табылды