Паттайяда туристің шабаданынан 17 жастағы қыздың мәйіті табылды

Паттайя қаласында 17 жастағы қызды өлтірді деген күдікпен австралиялық азамат ұсталды. Таиланд полициясы 46 жастағы Австралия азаматы Саймон Питер Карманды ұстады. Ол 17 жастағы қызды өлтірді деген күдікке ілінген, деп хабарлайды Orda.kz.        

Күдікті 26 маусым кешінде Суварнабхуми әуежайында, Австралияның Перт қаласына Jetstar әуе рейсімен ұшып кетпек болған кезде қолға түскен.

Тергеу мәліметінше, 24 маусым кешінде 17 жастағы Тунчанок Донхомла құрбысымен бірге Накхонратчасима провинциясынан Паттайяға келген. Кейін қыздар екіге бөлініп кеткен. Шамамен сағат 21:00-де Тунчанок Beach Road көшесінде австралиялық азаматпен танысқан. Полиция олардың осы түнге дейін бір-бірін танымайтынын айтады.

25 маусым күні сағат 03:34-те бейнебақылау камералары ер адам мен қыздың қол ұстасып, Jomtien Second Road көшесіндегі кондоминиумға кіргенін тіркеген. Олар австралиялықтың жалға алған бөлмесіне көтерілген. Тергеушілердің айтуынша, осыдан кейін бөлмеден күдіктіден басқа ешкім кіріп-шықпаған.

Қыз байланысқа шықпай қойғаннан кейін, оның құрбысы полицияға жүгінген. Тергеушілер оның өмірінің соңғы сағаттарын анықтау үшін бейнебақылау жазбаларын зерттей бастаған.

Тергеуде жергілікті БАҚ жариялаған бейнебақылау камералары басты рөл атқарды. Оларда таңертең 17 жасар қыздың қолынан ұстап, ер адамның қонақ үйге қалай кіріп кеткені көрінеді. Сосын кешке қарай ол ғимараттан үлкен қара шабаданмен шығады.

Ер адам «жүгін» мотоциклге дейін оңай жеткізеді, содан кейін оны ұзақ уақыт жүктейді. 20 минуттан кейін ол қонақ үйге қолы бос оралады.