АҚШ елшілігі: Сұхбат қазақ тілінде өтіп, 10 жылдық виза беріледі

Қазақстандағы АҚШ елшілігінің баспасөз атташесі Кристофер Соренсен АҚШ визасын алу процесіне қатысты маңызды мәліметтермен бөлісті, деп хабарлайды Orda.kz.        

Ақпарат  АҚШ-тың Қазақстандағы дипломатиялық миссиясының Instagram парақшасында жарияланған.

«Қазақстанда жыл сайын мыңдаған өтініш беруші виза алады. Қазақстан – Орталық Азиядағы АҚШ визасы 10 жылға дейін берілетін жалғыз ел. Ең бастысы – анкетаны шынайы толтырып, сұхбат барысында сұрақтарға адал жауап беру», – деді Кристофер Соренсен. 

Оның айтуынша, кейбір агенттіктер виза алу мүмкіндігін арттыру үшін өтінішке жалған немесе нақты емес ақпарат енгізуі мүмкін. Алайда мұндай деректер анықталған жағдайда виза берілмейді, ал ауыр жағдайларда болашақта мүлде виза алу мүмкіндігінен айырылуыңыз мүмкін.

«Сонымен қатар делдалдардың қызметі көбіне артық шығынға әкеледі. Сондықтан барлық ақпаратты тек шынайы түрде ұсыну қажет. Әдетте паспорт, DS-160 сауалнамасын растау, әңгімелесуге жазба парағы және таяудағы фотосурет жеткілікті. Қосымша құжаттар тек жекелеген жағдайларда ғана сұратылады»,— деді ол.

Сонымен қатар елшілік қызметкері әңгімелесу үшін ағылшын тілін еркін білу қажет деген сөзді жоққа шығарды.

«Қазақстанда әңгімелесуді ағылшын, қазақ немесе орыс тілдерінде өткізуге болады. Алайда кейбір студенттік және жұмыс визалары үшін ағылшын тілін меңгергендігін растау қажет» ,— деді Кристофер Соренсен. 

Ол егер бұрын виза беруден бас тартылса, енді виза алуға жол жоқ деген ұңысды да жоққа шығарды.

Оның айтуынша, алдыңғы бас тарту болашақта автоматты түрде бас тартылады дегенді білдірмейді. Егер сіздің жағдайыңыз өзгерсе, сіз қайтадан өтініш бере аласыз. Ең бастысы - өз жағдайыңды адал айтып, шынайы ақпарат беру.

B1/B2 визасы бойынша АҚШ-та жұмыс істеуге болады деген ақпаратқа қатысты ол:

«Жоқ. B1/B2 визасы тек қысқа мерзімді іскерлік сапарлар мен туризмге арналған. Ол АҚШ-та жұмыс істеуге немесе қызмет көрсетіп, ақы алуға құқық бермейді. Виза шарттарын бұзу депортацияға және келуге тыйым салуға әкеп соғуы мүмкін» деп жауап берді. 

Туристік виза бойынша жұмысқа орналасуға немесе мәртебесін өзгертуге уәде берген делдалдарға сенбеңіз. Өз визаңыздың шарттарын және АҚШ-та болу мерзімдерін әрдайым сақтаңыз, деп кеңес берді дипмиссия өкілі.

Оқи отырыңыз:

• Қазақстан жаңа инвесторлық виза енгізеді
• АҚШ мемлекеттік департаменті Қазақстан және тағы 74 ел үшін иммиграциялық виза беруді тоқтатты
• Қазақстандықтар қай елдерге төлқұжатсыз бара алады