«Астанада кран құлап, жұмысшы қаза тапты»: министрлік түсініктеме берді

Астанада 18 шілде күні қатты жел салдарынан құрылыс алаңындағы мұнара краны құлады. Кран кабинасында болған жұмысшы оқиға орнында көз жұмды, деп хабарлайды Orda.kz.

Апат BI Group компаниясы салып жатқан ABYROI тұрғын үй кешенінің құрылыс алаңында болған. Астана қалалық полиция департаменті тергеу жұмыстарын бастады. Құрылыс кезінде еңбек қауіпсіздігі талаптарының бұзылуына байланысты қылмыстық іс қозғалды.

BI Group өкілдерінің мәлімдеуінше, апат болған күні кран жарамды күйде болған және таңертең қажетті техникалық тексеруден өткен.

Индустрия және құрылыс министрлігіне қарасты Құрылыс және тұрғын үй-коммуналдық шаруашылық істері комитетінің төрағасы Бақытжан Жүнісбеков оқиғаға байланысты пікір білдірді.

«Бұл жағдайда мердігер ұйымнан немесе нақты осы көтергіш техниканы пайдаланған тараптан заңбұзушылықтар анық байқалады. Қай тарап жауапты екені тергеу барысында нақтыланады. Ал біздің комитет тарапынан қандай да бір қосымша бақылау шараларын күшейту әзірге жоспарланбады», – деді Бақытжан Жүнісбеков.

Айта кетейік, дәл осы күні, 22 шілдеде Астанада автобус апатынан соң аяғынан айырылған қыз үйіне шығарылды.