Астанада автобус апатынан соң аяғынан айырылған қыз үйіне шығарылды

22 шілде 2025 10:43 Альфия Адамбек

Фото: Instagram/ Гүлбану Әниятқызы

Астанада болған автобус апатынан соң аяғынан айырылған қыз оңалту орталығынан үйіне шығарылды, деп хабарлайды Orda.kz.

7 жастағы Алуа Бекеннің анасы Tengrinews.kz тілшісіне хабарласып, баланың жағдайы туралы баяндады.

«Қазір бәрі жақсы. 18 шілдеде бізді оңалту орталығынан шығарды. Қазір демалып жатырмыз. Жақында протездермен айналысуды бастаймыз, оңалтудан басқа жерде өтеміз», – деді қыздың анасы.

Алуа Бекеннің эмоционалдық жағдайы да тұрақты көрінеді. Анасы қыздың өзін жақсы сезінетін айтты.

«Қызымның жағдайы жақсы, өзін қалыпты сезінеді. Бізге алты айға төрт бөлмелі пәтер берілді. Бізге пәтер сыйға тартылды, бірақ оның құрылысы қазанда аяқталады», – деді Алуаның анасы.

Еске сала кетейік, 2 маусым күні кешке таман Астанада жолаушылар автобусы «Самал» ықшамауданының маңында бағанға соғылды. Апаттан 15 адам жарақат алып, бір бүлдіршін қос аяғынан айырылды.

Сонымен қатар, зардап шеккендер «Еуразия» СҚ бөлімінен өтемақы алатыны мәлім болды. Оларға амбулаторлық немесе стационарлық емдеуге жұмсалатын шығын үшін кемінде 200 АЕК, яғни 786 мың теңге беріледі. Қазіргі таңда 15 адамның үшеуі ауруханада ауыр жағдайда жатыр. Ал қос аяғынан айырылған қызға 19,6 миллион теңге беріледі. Астана қаласының әкімі Жеңіс Қасымбек қыздың отбасына баспана берілетінін айтты.

Жаңалықтар

барлық жаңалықтар