Астанада автосалон жұмысшысы клиенттердің көлігін сатып жіберген

Елордада автосалондардың бірінде сату менеджері болып қызмет атқарған ер адам жеке пайдасын көздеп, алдау және сенімге қиянат жасау  арқылы қала тұрғындарына тиесілі екі автокөлікті заңсыз қолды еткен, деп хабарлайды Orda.kz.       

Жәбірленушілер өздеріне тиесілі «Changan CS55 Plus» және «Toyota Camry» маркалы көліктерін сату мақсатында аталған автосалонға тапсырған. Біраз уақыт өткен соң, менеджер оларға көліктерге сатып алатын адам табылғанын айтып, қаражат бірнеше күн ішінде аударылатынына сендірген. Сөйтіп ол көлік иелерін автокөліктерді үшінші тұлғаның атына қайта рәсімдеуге көндірген.

Алайда көліктер қайта тіркелгеннен кейін, менеджер сатудан түскен ақшаны өз қажетіне жұмсап жіберген.

Осы заңсыз әрекет салдарынан жәбірленушілерге жалпы көлемі 23 млн теңге болатын материалдық шығын келген.

Сот барысында мемлекеттік айыптаушы айыпталушының кінәсін толық дәлелдейтін жеткілікті дәлел ұсынды. Сот отырысында ер адам өз кінәсін толық мойындап, жасаған ісіне өкініш білдірді.

Сот үкімімен ол кінәлі деп танылып, 3 жыл 4 ай мерзімге бас бостандығынан айырылды.

Сонымен қатар, жәбірленушілердің келтірілген шығынды өндіру туралы азаматтық талап-арыздары толық қанағаттандырылды. Қазіргі таңда сот үкімі заңды күшіне енді.

Қала прокуратурасы азаматтарға ескерту жасап, меншікке қарсы қылмыстар үшін мүлікті тәркілеумен қатар 7 жылға дейін бас бостандығынан айыру жазасы қарастырылатынын атап өтіп, заң талаптарын қатаң сақтауға шақырды.

Оқи отырыңыз:

• Қытай АҚШ-пен соғыс және Тайваньды басып алу сценарийлерін макет арқылы пысықтауда
• Қазақстандық турист Ыстықкөлде 14 жастағы қызды соққыға жықты