Orda.kz сайтының бұрынғы бас редакторы Гүлнәр Бажкеноваға сот үкімі шықты

Алматының Бостандық аудандық сотында 18 тамызда Orda.kz сайтының бұрынғы бас редакторы Гүлнар Бажкеноваға қатысты сот үкімі жарияланды, деп хабарлайды Orda.kz.       

Гүлнәр Бажкеноваға заңсыз кәсіпкерлікпен айналысты, сеніп тапсырылған мүлікті ысырап етті және жалған ақпарат таратты деген айыптар тағылған.

Сотқа дейінгі соңғы отырыста прокурор Қуаныш Қанапиянов айыптардың жиынтығы бойынша оған сегіз жыл бас бостандығынан айыруды, жазаны өтеуді екі жылға кейінге қалдыруды және бес жыл бойы журналистік, жария және басшылық қызметпен айналысу құқығынан айыруды сұраған.

Сот отырысында судья Елена Кван Гүлнәр Бажкенованы кінәлі деп танып, оған сегіз жыл бас бостандығынан айыру жазасын тағайындады. Алайда жазаны өтеу мерзімі екі жылға кейінге қалдырылды.

Сот шешіміне сәйкес, ол жазасын орташа қауіпсіздік деңгейіндегі мекемеде өтеуі тиіс. Сонымен қатар Бажкеноваға бес жыл мерзімге журналистік және жария қызметпен айналысуға тыйым салынды.

Жазаны өтеу мерзіміне 2026 жылғы 1 ақпаннан бастап өткен күндер есептелді.

Бұрынғы бас редактор өзіне тағылған айыптардың ешқайсысы бойынша кінәсін мойындаған жоқ.

Сот процесі екі айға жуық уақытқа созылды. Гүлнәр Бажкеноваға қатысты сот процесі 2 шілдеде басталған болатын. Ол 2025 жылғы 1 желтоқсаннан бері үйқамақта болған.

Кейін оның адвокаты Мұрат Адамның адвокаттық лицензиясынан айырылуына байланысты сот Бажкеноваға мемлекет тағайындаған қорғаушыны бекіткен.

Осылайша, сот Бажкеноваға қатысты қылмыстық істің негізгі қаралуын аяқтап, үкім шығарды. Алайда ол тағылған айыптармен келіспейтінін және кінәсін мойындамайтынын мәлімдеген.

Оқи отырыңыз:

• Orda.kz редакциясына қаруланған әскерилер келіп, тінту жүргізіп жатыр
• Гүлнәр Бажкенованың адвокатын лицензиясынан айырмақ: Алғашқы отырыс дауға ұласты