Әскери бөлімнен таңертең шығып кеткен: Өскеменде сарбаз іздестірілуде

Өскеменде әскери бөлімнен өз еркімен кетіп қалған мерзімді әскери қызметшіні әскери полиция іздестіріп жатыр, деп хабарлайды Orda.kz.

Әскери полиция мәліметінше, іздестіріліп жатқан әскери қызметші 22 жаста. Бойы – 177 см, дене бітімі орташа, шашы қысқа, қара. Ерекше белгісі – бетінде меңі бар. Болжам бойынша, ол әскери  киіммен кеткен, алайда азаматтық киім киіп үлгеруі мүмкін.

«2026 жылғы 23 шілдеде сағат 06:30 шамасында 27943 әскери бөлімінің зымыран-артиллериялық қару-жарақ (РАВ) қоймасында тәуліктік кезекшілікте тұрған қатардағы жауынгер Мархан Айқын Ерланұлы қызмет орнын өз еркімен тастап кеткен. Алдын ала мәлімет бойынша, ол қойма аумағынан шығып, белгісіз бағытқа кеткен. Қазіргі уақытқа дейін оның қайда екені белгісіз»,  деп жазылған Өскемен гарнизоны әскери полиция бөлімі бағдарында.

Әскери қызметшінің жүрген жерін анықтауға көмектесетін ақпарат үшін ақшалай сыйақы жарияланған. Ақпарат берген адамның аты құпия сақталатынына кепілдік беріледі.

Әскери полиция әскери қызметшінің жүрген жері туралы қандай да бір мәлімет білетін азаматтарды хабарласуға шақырды.

Оқи отырыңыз:

• Жамбыл облысында медфармбақылау департаментінің басшысы пара алып, ұсталды
• Қазақстан мен Ресей президенттеріне сауда және логистика саласындағы жобалар таныстырылды