Жамбыл облысында медфармбақылау департаментінің басшысы пара алып, ұсталды

Тараз қаласында Жамбыл облысы бойынша Медициналық және фармацевтикалық бақылау комитеті департаментінің басшысы Айгүл Балғабаеваға қатысты сот процесі басталды, деп хабарлайды Orda.kz тілшісі. 

Ол жеке медициналық мекемеге лицензия бергені үшін миллион теңге пара алды деп айыпталуда. Департамент басшысымен бірге айыпталушылар орнында екі жеке компанияның өкілі де бар.

Редакцияға түскен мәліметке сәйкес, қылмыстық іс Қазақстан Республикасы Қылмыстық кодексінің 366-бабының 2-бөлігі («Пара алу») бойынша қаралуда.

Тергеу нұсқасы бойынша, Балғабаева жеке медициналық ұйымдарға медициналық қызметке лицензия беру туралы мәселені оң шешу үшін ақша талап еткен. Айыптау дерегінше, болжамды пара көлемі бір миллион теңге.

Айгүл Балғабаева аталған департаментті 2024 жылдың қыркүйегінен бастап басқарған. Ведомствоның міндетіне медициналық ұйымдардың қызметін бақылау, медициналық және фармацевтикалық қызметті лицензиялау, сондай-ақ денсаулық сақтау саласындағы заң талаптарының сақталуын қадағалау кіреді.

Еске сала кетейік, бұл департаменттегі алғашқы жемқорлық дауы емес. 2025 жылы сот департамент басшысының орынбасары Мәдина Шыналиеваны кінәлі деп таныған.

Оқи отырыңыз:

• Тоқаев соғысты «мұздатуды» ұсынды: Президенттің Омбыдағы мәлімдемесі нені аңғартады?
• Трамп Иранға жасалатын соққыны тоқтатуға бұйрық берді