Антикор Шерзат Полаттың әкесіне қарсы іс қозғады

Талғарда кісі қолынан қайтыс болған Шерзат Полаттың әкесі Қаржаубай Нұрымовқа қатысты қылмыстық істі сыбайлас жемқорлыққа қарсы іс-қимыл агенттігі департаменті тергеп жатыр, деп хабарлайды Orda.kz.

 Informburo.kz  мәліметінше, Қаржаубай Нұрымовтың үстінен полиция қызметкеріне қауіп төндіру фактісі бойынша іс қозғалған.

«Азамат қоғамдық орында заңға қайшы әрекет жасағандықтан, оны ұстау туралы шешім қабылданды. полиция қызметкерлеріне күш қолдану қаупі бойынша қылмыстық іс қозғалып, одан әрі тергеу үшін іс Алматы облысы бойынша сыбайлас жемқорлыққа қарсы іс-қимыл агенттігі департаментіне жіберілді», деп мәлімдеді министрлік өкілдері.  

Сонымен қатар, Нұрымовқа қатысты сотқа дейінгі тергеуді неліктен сыбайлас жемқорлыққа қарсы іс-қимыл агенттігі департаменті жүргізіп жатқаны нақты көрсетілмеген.

Бұған дейін, облыстық полиция департаменті Нұрымовқа бөтеннің мүлкін қасақана бүлдіру фактісі бойынша қылмыстық іс қозғалғанын мәлімдеген болатын.  

«10 желтоқсанда Еңбекшіқазақ ауданы Азат ауылында болған заңсыз әрекеттер салдарынан көлік иесіне материалдық шығын келтірілгені анықталды. Бұл әкімшілік жауапкершілік шегінен айтарлықтай асып, қылмыстық сипаттағы іс ретінде бағаланды» деп жазылған департамент хабарламасында.

Айта кетейік, Қаржаубай Нұрымовтың інісі Нұрқанат Ғайыпбаев полицияның алдын ала мәліметі бойынша өз-өзіне қол жұмсаған. Марқұмның жаназасынан соң Азат ауылында журналистермен кездесу кезінде болған жанжал үшін Нұрымов 15 тәулікке қамауға алынған еді. Оқиға мен Ғайыпбаевтың өлімінің егжей-тегжейін мына репортаждан оқи аласыз.