Анасын қорғаймын деп жанын қиды: Жітіқарада 15 жастағы баланы өлтірген өгей әкеге үкім шықты

Қостанай облысының Жітіқара қаласында отбасылық жанжал кезінде 15 жастағы өгей ұлын өлтіріп, оның анасына да шабуыл жасаған ер адамға үкім шықты. Сот оны 23 жылға бас бостандығынан айырды, деп хабарлайды Orda.kz тілшісі.

Істі Қостанай облысының қылмыстық істер жөніндегі мамандандырылған ауданаралық соты қарады.

Сот материалдарына сәйкес, қайғылы оқиға Жітіқарада ішімдік ішілгеннен кейін болған. Ер адам жанжал шығарып, әйеліне пышақ ала жүгірген. Сол кезде анасын қорғауға оның 15 жастағы ұлы араласқан.

Өгей әкесі жасөспірімге төрт рет пышақ сұққан. Дәрігерлердің әрекетіне қарамастан, баланың өмірін сақтап қалу мүмкін болмады.

Әйел де жарақат алған. Оның көмек сұраған дауысын естіген ағасы жүгіріп келіп, жанжалға араласқан. Ол өгей әкенің одан әрі күш көрсетуіне жол бермеген.

Прокурор сотталушыны 22 жылға бас бостандығынан айыруды сұрады. Ал қаза тапқан жасөспірімнің туыстары ер адамға өмір бойына бас бостандығынан айыру жазасын тағайындауды талап етті.

Сот ер адамды адам өлтіру және адам өлтіруге оқталу бойынша кінәлі деп танып, 23 жылға бас бостандығынан айыруға үкім шығарды. Ол жазасын қылмыстық-атқару жүйесінің орташа қауіпсіздік мекемесінде өтейді.

Үкім әзірге заңды күшіне енген жоқ.

Оқи отырыңыз:

• Ат байлаған арқанға ілініп қаза тапқан қызға қатысты оқиғаның жай-жапсары белгілі болды
• Оралда «тентек кәде» сұраған «әртістің» тісі үгітіліп, қабырғасы сынды