Алматыдағы Hilton қонақүйіне сот орындаушылары қайта келді: 170 адам жұмыссыз қалуы мүмкін

Алматыда сот орындаушылары қонақүйді жабуға байланысты рәсімдерді жүргізу үшін Hilton Almaty қонақүйіне қайта келді. Қызметкерлердің айтуынша, 170-ке жуық адам жұмыссыз қалу қаупіне тап болған, деп хабарлайды Orda.kz.       

Бұған дейін сот орындаушылары қонақүйге келіп, ішінде туристер мен қонақтар болғанына қарамастан, есіктерін мөрлеп кеткен еді. Ол кезде бұл жағдай қоғамда қызу талқыланған болатын.

Бүгін атқарушылық іс жүргізу өкілдері қонақүйге тағы да келді. Қызметкерлердің сөзінше, бүкіл қонақүйдің жұмысын көшіруге және ұйымдастыру мәселелерін шешуге небәрі 10 күн ғана уақыт берілген.

Қызметкерлер нысан жабылған жағдайда жүздеген адамның жұмыссыз қалуы мүмкін екенін, ал қонақтардың шұғыл түрде басқа орналастыру орындарын іздеуге мәжбүр болатынын айтып алаңдаушылық білдіруде.

Оқиғаның мән-жайы мен тараптардың ресми түсініктемелері нақтыланып жатыр.

Еске салсақ, Алматыдағы Hilton Almaty қонақүйінде болған көшіру дауы қоғам назарын аудартқаны туралы жазғанбыз. Белгілі болғандай, сол кезде  қонақүй ішінде шамамен 200 турист орналасып, олардың арасында америкалық әскери қызметкер болған.

Сол күні оқиға орнына Алматы қаласының Туризм басқармасының өкілдері келіп, бұл жағдай туралы алдын ала хабардар болмағандарын, мәселені тек БАҚ арқылы білгенін мәлімдеген еді.

Сот орындаушысы 9 маусымға дейін мерзімін ұзарту туралы шешім қабылдады. Алайда Hilton қонақүйінің құрылтайшылары бұл шешімге наразылық білдіруде. Олардың айтуынша, он күннің ішінде бір бөлмелі пәтердің өзін көшіру қиын, ал тұтас қонақүй кешенін көшіру тіпті мүмкін емес. Олар мұндай қысқа мерзімде мүлікті шығарып, қызметкерлерге қатысты мәселелерді шешіп, қонақүйдің барлық операциялық процестерін аяқтау мүмкін еместігін айтады.

Оқиға орнында кезекші прокурор да болды. Ол журналистерге сот шешімінің орындалуы кезінде қоғамдық тәртіп пен заңдылықтың сақталуын бақылау үшін келгенін түсіндірді. Алайда прокуратура өкілінің қатысуы кәсіпкерлер арасында сұрақтар мен түсінбеушілік туғызды. Олардың пікірінше, бұл азаматтық-құқықтық сипаттағы дау болғандықтан, мемлекеттік органдардың көшіру процесін неге мұншалықты жіті бақылап отырғаны түсініксіз. Бұл жағдай кәсіпкерлердің наразылығын одан әрі күшейте түсті.

«Адамдар ертең не боларын білмейді»: Алматыдағы Hilton қызметкерлері көшуге уақыт беруді сұрайды

Алматыдағы Hilton қонақүйін босату төңірегіндегі жағдай тек басшылықты ғана емес, қарапайым қызметкерлерді де алаңдатып отыр. Қонақүй қызметкерлерінің айтуынша, ғимаратты қысқа мерзімде босату туралы шешім ұжым үшін күтпеген жағдай болған.

Қонақүйде бес жылдан бері жұмыс істейтін қызметкер Ғалымжаннның айтуынша, болып жатқан оқиғалар қызметкерлердің көңіл күйіне айтарлықтай әсер еткен.

«Бұл жағдай бүкіл ұжымға ауыр тиді. Көптеген қызметкерлер әрі қарай не болатынын, қалай әрекет ету керектігін білмей отыр. Мұндай шешім біз үшін күтпеген жағдай болды. Адамдардың сұрағы көп, бірақ әзірге нақты жауап жоқ», — дейді ол.

Оның сөзінше, қонақүй тек жастарды ғана емес, жасы үлкен қызметкерлерді және денсаулығында белгілі бір шектеулері бар адамдарды да жұмыспен қамтып отыр.

«Біздің қонақүй әртүрлі адамдарға жұмыс береді. Жаңа жұмыс табу оңай болмайтын қызметкерлер де бар. Әсіресе жасы үлкен адамдар алаңдап отыр. Әрине, бұл олардың болашағына деген алаңдаушылықты күшейтеді», — дейді қызметкер.

Ол қонақүйде жылдар бойы ұйымшыл әрі тату ұжым қалыптасқанын, көптеген маңызды іс-шаралардың өткізілуіне атсалысып келе жатқанын атап өтті.

«Біз көп жылдан бері бірге жұмыс істеп келеміз, ауқымды шараларды ұйымдастырамыз. Сондықтан адамдар бұл жағдайдың неге осылай болып жатқанын түсінгісі келеді. Бізге аздап болса да үміт пен уақыт берілсе дейміз. Мұндай мәселелерді бірнеше күннің ішінде шешу мүмкін емес», — деді Ғалымжан.

Қызметкерлер жағдайдың оң шешімін тауып, жұмыс орындарының сақталуына және адамдарға алдағы өзгерістерге дайындалуға мүмкіндік беріледі деп үміттенеді.

Оқи отырыңыз:

• Алматыдағы Hilton қонақүйіндегі дау: Ішінде 200 турист пен америкалық әскери қызметкерлер болған
• «Бізге ешкім ескерткен жоқ»: Hilton дауына байланысты қонақүй өкілдері сот орындаушысымен сөзге келді
• Мұрат Әбенов Алматыдағы Hilton қонақ үйінің төмен бағаланғанына наразы болды