Алматыдағы блэкаут: Қала көшелерінде 1300-ден астам заңбұзушылық болды

Кеше Алматыда жол қозғалысы ережелерін бұзудың 1357 фактісі тіркелді. Оның ішінде жол қозғалысына қатысушылардың өмірі мен денсаулығына айтарлықтай қауіп төндіретін 160 өрескел заң бұзушылық тіркелген, деп хабарлайды Orda.kz  Алматы Өңірлік коммуникациялар қызметіне сілтеме жасап.

Алматы Өңірлік коммуникациялар қызметі қалалық прокуратураның мәліметіне сүйеніп, өткен тәулікте мегаполис аумағында жол қозғалысы ережелерін бұзудың 1357 фактісі анықталғанын хабарлады.

Олардың ішінде жол қозғалысына қатысушылардың өмірі мен денсаулығына жоғары қауіп төндіретін 160 өрескел заң бұзушылық тіркелген.

Анықталған заң бұзушылықтар қатарында көлік құралын мас болып басқарудың 8 оқиғасы тіркелсе, бір адам көлік басқару құқығынан айырылғанына қарамай көлік жүргізген. Сонымен қатар  маневр жасау ережелерін бұзу, соның ішінде қауіпті маневр жасаудың («шашка») – 64 жағдайы, қауіпсіздік белдігін тақпаудың 45 оқиғасы анықталса, 13 жүргізуші
қарсы қозғалыс жолағына шығып кеткен. Оның үстіне көлік жүргізу кезінде ұялы телефон пайдаланған 29 адам белгілі болды.

Осындай заңбұзушылықтардан кейін 22 көлік арнайы тұраққа қойылды.

Еске сала кетейік, 14 тамызда Алматы мен Алматы облысында электр жарығы жаппай өшіп, жұртты біраз әуре-сарсаңға түсірді.

Энергетика министрлігінің мәліметінше, бұған Орталық Азияның энергетикалық жүйесі тарапынан электр энергиясы ағымының күрт өзгеруі салдарынан энергожүйеде қуаттың кенет артуы себеп болған.

Соның нәтижесінде апатқа қарсы автоматты жүйе іске қосылып, Қазақстанның бірқатар өңірінде электр энергиясының бір бөлігі ажыратылды.

Алматыда бағдаршамдар жұмыс істемей, жолдарда кептеліс пайда болды. 

Оқи отырыңыз:

• Қазақстандағы электр желісіндегі ақауға не себеп болды? KEGOC жауабы
• Алматыда бағдаршамдар іске қосылып, метро жұмысын қайта бастады