Қазақстандағы электр желісіндегі ақауға не себеп болды? KEGOC жауабы

Қазақстанның бірыңғай электр энергетикалық жүйесіндегі технологиялық бұзылудың алдын ала себебі белгілі болды, деп хабарлайды Orda.kz.

KEGOC мәліметінше, ақауға Орталық Азияның біртұтас энергожүйесі тарапынан қуаттың күрт артуы себеп болуы мүмкін.

Бұған дейін сағат 14:38-де 500 кВ кернеулі үш әуе электр желісі — Л-5400, Л-5300 және Л-5320 апатты түрде ажыратылғаны хабарланған. Соның салдарынан 300 МВт жүктеме өшірілді.

Мұның алдында Энергетика министрлігі KEGOC желілері арқылы электрмен жабдықтау толық қалпына келтірілгенін мәлімдеді. Ал өңірлердегі энергиямен қамту ұйымдары тұтынушыларды кезең-кезеңімен қайта қосуды жалғастырған.

KEGOC мәліметінше, сағат 16:12-дегі жағдай бойынша Алматы энерготорабындағы электрмен жабдықтау қалпына келтірілген.

Бұған дейін не болған?

14 тамызда сағат 14:38-де Алматы мен Алматы облысының бірқатар ауданында электр жарығы өшті. KEGOC-ке тиесілі 500 кВ-тық үш әуе электр желісі — Л-5400, Л-5300 және Л-5320 апатты түрде ажыратылған. Осының салдарынан Алматы мен облыстағы тұтынушылардың бір бөлігі электр жарығынсыз қалды. Ажыратылған жүктеме көлемі 300 МВт болған.

Алматы облысында жарық Жамбыл, Балқаш, Есік, Қарасай, Шелек, Райымбек, Ұйғыр, Іле, Кеген және Талғар аудандарында өшсе, Алматының Бостандық, Наурызбай, Әуезов, Медеу және Алатау аудандарында да жарыққа қатысты ақаулар тіркелді.