Алматы мектептерінде соңғы қоңырау бірыңғай форматта өтеді

25 мамыр күні Алматы қаласының барлық мектептерінде «Білімім — Отаныма!» тақырыбында бірыңғай сынып сағаты өтеді, деп хабарлайды Orda.kz.        

Бұл туралы Қоғамдық коммуникациялар орталығында өткен брифингте Алматы қаласы Білім басқармасының орта білім беру бөлімінің басшысы Ақмарал Айтуарова мәлімдеді.

Оның айтуынша, сынып сағаты аясында оқу жылының қорытындылары шығарылып, оқушылардың жетістіктері мен мектеп өміріндегі маңызды оқиғалар атап өтіледі. Сондай-ақ тәрбие мәселелеріне, білімге құрмет пен қауіпсіздік мәдениетіне ерекше көңіл бөлінеді.

Брифинг барысында мейрамханаларда, дәмханаларда, жалға алынған коттедждерде және демалыс орындарында бітіру кештерін өткізуге тыйым салынғаны тағы да еске салынды. Сондай-ақ автокортеж ұйымдастыруға да рұқсат берілмейді.

Бұдан бөлек, ата-аналардан ақша жинауға және мұғалімдерге сыйлық беруге де тыйым салынған.

Еске салсақ, кеше ғана Асхат Аймағамбетов түлектер кеші «даңғойлық жәрмеңкесіне» айналғанын айтқан болатын. Депутат ата-аналар мен түлектердің мектеп бітіруді атап өткісі келетінін түсінетінін айтты. Алайда ол оқу-ағарту министрлігі мен ІІМ секілді құзырлы органдарды көтеріп отырған әлеуметтік әділеттілік пен қауіпсіздік мәселелерін ескеруге шақырды.

Оқи отырыңыз:

• Асхат Аймағамбетов түлектер кеші «даңғойлық жәрмеңкесіне» айналғанын айтты
• Мәжіліс сайлау өткізу ережелерін қатаңдатуға арналған түзетулерді мақұлдады
• Базарбек шенеуніктердің бос уәдесін сынады: ҚҚС жойылды, ұшақ билеті арзандады ма?