Алматы – Қорғас тас жолындағы бұзылған бетон көліктерге жаппай зақым келтіріп жатыр

Алматы – Қорғас тас жолында жолдан шығып тұрған бетон кесегі бірнеше көлікті зақымдады.  Әлеуметтік желілерде Алматы – Қорғас («бетонка») тас жолынан түсірілген видео таралуда. Онда жол жабынының ақауына байланысты бірнеше көліктің зардап шеккені көрсетілген, деп хабарлайды Orda.kz.       

Бейнероликке берілген түсіндірмеде Бәйдібек би ауылына бұрылысқа жетпей орналасқан жол бөлігінде бетонның бір бөлігі қауіп келтіріп, сыртқа шығып тұрғаны айтылған. Жүргізушілер жоғары жылдамдықпен келіп, сол кедергіге соғылып көліктері зақымданып жатыр.

Кадрларда жол жиегінде мәжбүрлі түрде тоқтаған көліктер көрінеді. Мәселен Jetour кроссоверінің дөңгелегі толық жарылып, дискісі зақымданған, Mercedes G-Class жол талғамайтын көлігінің жанармай багы тесілген, Hyundai көлігінің қозғалтқаш қорабына бетон тиіп, майы жерге ағып кеткен.

Жалпы алғанда, осы жол бөлігінде ақау салдарынан шамамен бес көлік тұрып қалған. Көлік иелерінің айтуынша, олар «ҚазАвтоЖол» қызметкерлері мен полицияны 102 нөмірі арқылы шақырмақ болғанымен, нәтиже болмаған.

Сонымен қатар, оқиға орнынан өтіп бара жатқан екі патрульдік полиция көлігі уақыттарының жоқтығын алға тартып, тоқтап көмектесуден бас тартқаны айтылған.

Жолда қалған көлік иелері бұл бағытпен жүретін жүргізушілерге барынша мұқият болуды ескертіп, шырылдап жүр.

Оқи отырыңыз:

• Көлік прокуратурасы: Қаруыңды тапсырып — тыныш ұйықта
• Мектеп қызметкері мас болып көлік айдап, екі бала мен жүкті әйелді қағып өлтірді
• Көлік салығына байланысты кімдердің шоттары бұғатталады?