Мектеп қызметкері мас болып көлік айдап, екі бала мен жүкті әйелді қағып өлтірді

Түркістан облысында сұмдық қайғылы оқиға болды. Арыс қаласында жеңіл көлік жүргізген әйел жеке тұрғын үйдің қоршауына соғылып, қоршау алдында орындықта отырған адамдарды қағып кеткен, деп хабарлайды Orda.kz.

Салдарынан төрт адам қаза тапты, олардың екеуі кішкентай бала. Қайтыс болған әйелдердің бірі жүкті болған. Тағы екі адам ауыр жарақатпен ауруханаға жеткізілді.

Көлікті 52 жастағы Бибінұр Қасымова басқарған. Ол мектепте жұмыс істейді, ал бос уақытында такси қызметімен айналысқан. Сараптама қорытындысы бойынша, әйел көлікті мас кезінде айдағаны анықталған.

Полиция департаментінің мәліметінше үш адам қаза тауып, екі адам жарақат алған жол-көлік оқиғасы бойынша қылмыстық іс қозғалды.

«Алдын ала мәліметтер бойынша, Арыс қаласында JAC маркалы автокөліктің жүргізушісі мас кезінде бірнеше адамды қағып, қашып кеткен. Оқиға орнына полиция қызметкерлері дереу шықты. Жедел-іздестіру іс-шараларының нәтижесінде күдікті ұсталып, уақытша ұстау изоляторына қамауға алынды», деп хабарлады ПД. 

Оқиға орнында үш адам, оның ішінде екі кәмелетке толмаған жасөспірім қайтыс болды. Зардап шеккен 2 адам медициналық мекемеге жеткізіліп, оларға қажетті көмек көрсетілді.

Қазіргі уақытта жедел-тергеу тобы мән-жайларды жан-жақты, толық және объективті анықтауға бағытталған барлық қажетті іс-шараларды жүргізуде. Тергеу қорытындысы бойынша тиісті процестік шешім қабылданады.

Оқи отырыңыз:

• 1,2 миллиард теңге жымқырды деп айыпталған Алмасбек Садырбайдың ісі: Сотта қандай мәселелер көтерілді?
• Тоқаев Пашинянды «Азаматтық келісім» партиясының парламенттік сайлаудағы жеңісімен құттықтады