Алматы әуежайы нөсерге шыдас бермей, шатыры шытынап, тағы да су басты

Алматы халықаралық әуежайы тағы да нөсер жаңбырға шыдамай, су астында қалды. 3 мамыр күні қалада жауған қатты нөсер жаңа әуежайдың шатырынан ішіне сорғалап, алаңдарын су басты, деп хабарлайды Orda.kz.      

Әлеуметтік желіде жарияланған видеода әуежай қызметкерлерінің тексеру аймағы мен паспорттық бақылау бөлігінде су басу салдарымен қарбалас болып жатқаны көрінеді. Куәгерлердің айтуынша, су ғимараттың ішіне шатырдан шелектеп сорғалаған.

Иә, Алматыда жаңбыр жауса — әуежай су астында қалатын болды. Бұл бірінші жағдай емес, осы жолы су  тексеру және паспорттық бақылау аймағын басты.

Куәгерлердің айтуынша, ғимараттың ішіне төбеден су төпеп, сыртта да жүруге мүмкін болмай,  адам түгілі көлік әрең өтетін көлшіктер пайда болған.

Әуе айлағының кіру және шығу жолдары уақытша жабылды. Кезек пайда болды, сол аралықта халықаралық терминал ішіндегі жағдайдың фотосын оқырмандар желілерде бөлісті.

Видео: Елена Разумихинаның Threads аккаунтынан

Оқиғаны әуежайдың баспасөз қызметі растады. 

«Қатты жауын-шашынның салдарынан Т1 және Т2 терминалдарының кейбір аймақтарында шатырдан су ағу дерегі тіркелді. Салдары 30 минут ішінде жедел түрде жойылды және рейстердің орындалуына әсер еткен жоқ» деп жазылған хабарламада.

Алматы әуежайы 2020 жылдан бастап TAV Airports Holdings компаниясына тиесілі. Бұл түрік компаниясының Алматыдағы ең ауқымды жобасы 2024 жылдың маусымында ашылған жаңа терминалдың құрылысы болды.

Жаңа халықаралық терминалдың ауданы — 54 мың шаршы метрге жуық. Оның құрылысына 780 млн доллар жұмсалды.

Еске салсақ, 2025 жылдың ақпанында құбыр жарылып, төбесінен су ағып кеткен болатын. Бұл мердігер ұйым сумен жабдықтау үшін резервтік құбыр орнатқан кезде болды. Ал 2024 жылдың шілдесінде әуежай терминалы жаңбырдан кейін су астында қалды.  

Баспасөз қызметінің мәліметінше, қазіргі уақытта әуежай қалыпты режимде жұмыс істеп тұр. Инфрақұрылымды тексеру жүргізіліп, себептері анықталып, алдағы уақытта мұндай жағдайлардың алдын алу шаралары қабылдануда.

Оқи отырыңыз:

• Алматы әуежайы түрік менеджерінің ұсталғаны туралы ақпаратты жоққа шығарды
• Полицейлер Алматы әуежайы қызметкеріне шабуыл жасаған ер адамға қатысты үш қылмыстық іс қозғады
• Жапонияның атақты әуежайы өз салмағын көтере алмай суға кетуі мүмкін
• «Қайрат» ФК дәрігері Астана әуежайында бомба туралы қалжыңдаймын деп жауапқа тартылды