Әлем көшбасшылары Тоқаевты Құрбан айтпен құттықтады

Құрбан айт мерекесіне орай әлемдік көшбасшылар Қасым-Жомарт Тоқаевқа құттықтау жолдады, деп хабарлайды Orda.kz. 

Ақорданың мәліметінше, Тоқаевқа шетел мемлекеттерінің басшылары мен халықаралық ұйым жетекшілерінен құттықтау хаттары мен жеделхаттар келіп түскен.

Алғашқы болып көрші мемлекеттің президенті Шавкат Мирзиёев өз құттықтауын жолдады. Мирзиёев құрбан айт ортақ тарих, тіл, дін мен дәстүр біріктіретін халықтар арасындағы бауырластық байланысты нығайта түсетінін атап өтті.

«Ортақ ұмтылыстарымыздың нәтижесінде елдеріміз арасындағы стратегиялық серіктестік пен одақтастық қатынастар алдағы уақытта да нығая беретініне сенімдімін», — деді Өзбекстан президенті.

Қырғызстан президенті Садыр Жапаров мерекені рухани тазару, қайырымдылық пен бірліктің символы деп атап, оның халықтар арасындағы тарихи достық пен өзара сенімді күшейте түсетініне сенім білдірді.

Ал Эмомали Рахмон Құрбан айттың достықты, өзара түсіністік пен тиімді ынтымақтастықты арттырудағы рөліне тоқталды.

«Ғасырлар бойы бұл қасиетті мереке халықтарды ізгілікке, жомарттыққа, әділдікке, мұқтаж жандарға көмектесуге және өзара қолдауға үндеп келеді» деп жазылған Тәжікстан президентінің жеделхатында.

Сонымен қатар, Сердар Бердымухамедов, Ильхам Әлиев, Мухаммед бен Заид Әл Нахаян, Мухаммед бен Рашид Әл Мактум, Хамад бен Иса Әл Халифа, Әбделмәжмт Теббун және өзге де мемлекет басшылары мен халықаралық ұйым жетекшілері Қазақстан президентіне құттықтау жолдады.

Оқи отырыңыз:

Тоқаев Құрбан айт мерекесімен құттықтады

Павлодар облысында ұшақ апатынан бір ұшқыш мерт болды

Ақтөбелік келіншек Луиш Нанидің футболкасын сатылмыға шығарды