Әл-Фарабидегі апат: Прокурор Пакқа 10 жылға бас бостандығынан айыру жазасын сұрады

Алматыда үш адамның өмірін қиған әл-Фарабидегі жол апатына қатысты сотта марқұм Томиристің әкесі 100 миллион теңге моральдық өтемақы сұрады, деп хабарлайды Orda.kz.       

Сотта қорғаушылар қызынан айырылған әкенің хатын оқыды. Онда Томирис оның өмірінің басты мәні болғаны, қызының тұрмысқа шығып, ана атанғанын көруді армандағаны жазылған.

Алайда айыпталушы Александр Пактың адвокаты бұл талапты қанағаттандырмауды сұрады. Қорғаушының уәжі бойынша, Томиристің анасы бұған дейін кінәлі тараптан өтемақы алып қойған.

Еске салайық, бұған дейін Томиристің әкесі Пакты ешқашан кешірмейтінін мәлімдеген.

Қайғылы оқиға 21 наурызда болған еді. Мас күйде қарсы жолаққа шыққан Пак Mercedes-пен соқтығысып, көліктегі үш адам мерт болды.

Алматыда үш адамның өмірін қиған атышулы жол апатына қатысты сот жарыссөзі өтіп жатыр. Мемлекеттік айыптаушы Әлібек Күмісбеков сотталушы Александр Пакты қауіпсіздігі төмен мекемеде 10 жылға бас бостандығынан айыруды талап етті. Оған қоса, прокурор оны көлік басқару құқығынан өмір бойына шеттетуді сұрады.

Айыптаушы тарап бұл қайғылы оқиғаның кездейсоқтық еместігін алға тартты. Оның сөзінше, айыпталушы бұған дейін де жол ережесін жиі бұзған. Ал оның мас күйінде әрі жоғары жылдамдықпен көлік басқаруы осындай орны толмас қасіретке әкеп соқтырды.

Алматыдағы жол апатынан көз жұмған Томиристің анасы сотқа онлайн қосылып, Александр Пакқа не үшін кешірім бергенін түсіндірді. Ол бұған ақша себеп болмағанын, басты мақсаты марқұмның рухы о дүниеде тыныш тапсын деген ниет екенін жеткізді. Шешімін ол күдіктінің ата-анасына да ашық айтқан.

«Жаназадан соң Пактың ата-анасы келді, мен сосын туыстарға оны кешіргенімді айттым. Жол апаты ауыр болды, ол апатта Пактың өзі де өліп қалуы мүмкін еді. Сонда кімді соттар едік?» — деді. 

Ол бұл қайғылы оқиғадан тек қаза тапқан үш жастың және сотталушының анасы ғана шын зардап шегіп отырғанын атап өтті. Апаттың өте ауыр болғанын ескерген ол, егер айыпталушының өзі де жан тәсілім еткенде жауапқа тартатын ешкім қалмайтынын түсініп, осындай тоқтамға келген.

Бұған дейін Томиристің әкесі Пакты мүлдем кешірмейтінін айтып, 100 млн теңге өтемақы сұраған еді. Ал прокурор Пакты 10 жылға қамауды талап етті.

Сотталушының кәмелетке толмаған балаларының болуы жазаны жеңілдететін мән-жай ретінде ескерілді. Еске салайық, 21 наурыз түні Zeekr көлігі қарсы жолаққа шығып, Mercedes-пен соқтығысып, салдарынан үш адам көз жұмған еді.

Оқи отырыңыз:

• Ақмола облысында 221 млн теңге табысқа кенелген заңсыз вейп саудасы тоқтатылды
• Катарда зауытта жарылыс болып, 50-ден астам адам зардап шегіп, 18 жұмысшы жоғалып кеткен
• Нұрлан Өнербаевтың анасы дүниеден озды