Әл-Фарабидегі апат: Пактың «100 QR 02» жалған нөміріне қатысты іс тоқтатылды

Әл-Фараби даңғылындағы адам өліміне әкелген жол апатына қатысты тағы бір қылмыстық іс тоқтатылды, деп хабарлайды Orda.kz.

Ішкі істер министрлігі әл-Фараби даңғылында болған резонансты жол-көлік оқиғасына байланысты қозғалған қылмыстық істердің бірі тоқтатылғанын мәлімдеді. Мемлекеттік нөмірлердің заңсыз берілуі мүмкін деген күдік бойынша қозғалған іс туралы болып отыр. Аталған іс Қылмыстық кодекстің 362-бабының 1-бөлігі («Билікті немесе лауазымдық өкілеттіктерді асыра пайдалану») бойынша тергелген.

ІІМ мәліметінше, 2026 жылғы 3 маусымда сотқа дейінгі тергеу қылмыстық құқық бұзушылық құрамының болмауына байланысты тоқтатылған. Бұған дейін, БАҚ мәліметінше, айыптау тарабы сотталушының тіркеу құжаттарына сәйкес келмейтін 100 QR 02 мемлекеттік нөмірімен жүргені айтылған.

Сонымен қатар адам өліміне әкелген жол апатынан бөлек, қызметтік әрекетсіздік фактісі бойынша тағы бір қылмыстық іс теркелген. Қазір бұған қатысты іс прокуратурада қаралып жатыр. Күдікті ретінде Алматы қалалық полиция департаменті басшыларының бірінің жүргізушісі болған полиция қызметкері танылған. 

ІІМ мәліметінше, бұл іс бойынша тергеу аяқталған. Қылмыстық кодекстің 370-бабы 4-бөлігінің 1-тармағы («Ауыр зардаптарға әкеп соққан қызметтік әрекетсіздік») бойынша қозғалған іс 2026 жылғы 20 мамырда аяқталып, қазір Алматы қаласының прокуратурасында зерделеніп жатыр.

Оқи отырыңыз:

Әл-Фарабидегі жол апаты: Пакқа кешірім берген отбасылар саны тағы да толықты

Әл-Фарабидегі жол апаты: Куәгерлердің бәрі Пактың ішімдік ішкенін көрмегенін айтты