Ақтөбелік депутат өз еркімен мандатынан бас тартты

Ақтөбеде «Lexus» автокөлігін мас күйінде жүргізген қалалық мәслихат депутаты және «Аманат» партиясының мүшесі Сәния Мұратова сайлау комиссиясына өзі арыз түсірді. 

Мұны Ақтөбе қалалық мәслихаттың төрағасы Анар Даржанова растады.

«Қазіргі уақытта аумақтық сайлау комиссиясына депутаттық мандатынан бас тарту туралы арыз түсті. Сессияға оны депуттаттықтан шығару жөнінде ұсыныс берілді. Әрі қарай жағдай сессия отырысында қаралады»,- деді ол. 

Сәния Мұратова 2021 жылдан бастап Ақтөбе қалалық мәслихатының депутаты. 

Осы оқиғадан соң «Аманат»  партиясының Ақтөбе облыстық филиалының
атқарушы хатшысы Ербол Данағұлов ресми орган шешімінен кейін ғана шара қолданылатынын айтқан болатын.

Еске салсақ, Ақтөбе қалалық мәслихатының депутаты, «Аманат» партиясының мүшесі Сәния Мұратова жол жүру ережесін бұзып, полицияға ұсталғаны туралы хабарладық. Сараптама қорытындысы 53 жастағы жүргізушінің алкогольдік  мас күйде болғанын көрсетті.

Жүргізушіге ҚР ӘҚБтК-нің екі бірдей бабымен, яғни,  «Көлiк құралын жолдың жүру бөлiгiне қою, қарсы жүру немесе басып озу ережелерін бұзу» және «Көлік құралын мас күйінде жүргізу» бойынша хаттама толтырылды.