Bloomberg басылымы Қазақстанды өңірдегі цифрландыру көшбасшысы деп атады

Беделді америкалық Bloomberg басылымы Қазақстан туралы ауқымды сараптамалық материал жариялап, елді жаһандық өзгерістерге тез бейімделудің ең табысты үлгілерінің бірі ретінде атады, деп хабарлайды Orda.kz.       

Мақала авторлары Қазақстан соңғы жылдардағы халықаралық тұрақсыздық жағдайында тек тұрақтылығын сақтап қана қоймай, Еуразиядағы маңызды экономикалық, логистикалық және технологиялық орталық ретіндегі орнын нығайтқанын атап өтеді.

Bloomberg бұл өзгерістердің символы ретінде Астананы мысалға келтіреді. 

«Ширек ғасыр бұрын қазіргі елорда жалпақ даладағы шағын қала болса, бүгінде танымал сәулеті мен ауқымды инфрақұрылымдық жобалары бар заманауи мегаполиске айналған. Бүгінгі күні Астана көркі көз тартар қала» деп жазды басылым.

Дегенмен, авторлар негізгі назарды елдің сыртқы келбетіне емес, оның жаңа геоэкономикалық рөліне аударған. Басылымның бағалауынша, Қазақстан ірі әлемдік нарықтарды байланыстыратын буын ретінде барған сайын сенімге ие бола түсуде.

Bloomberg еліміздің  Қытай, Ресей және Еуропа арасындағы орналасуын экономикалық артықшылық ретінде пайдаланып отырғаныны ерекше маңыз берген.

Bloomberg елдегі цифрлық трансформацияға да кеңінен тоқталған. Жарияланымда Қазақстан өңірдегі цифрландыру көшбасшыларының бірі ретінде аталады. Электрондық үкіметтің жоғары деңгейде дамуы және мемлекеттік басқаруда цифрлық қызметтің белсенді енгізілуі ерекше аталған.

Олар Қазақстанның жасанды интеллект саласындағы жоспарларына да қызығушылық танытқан. Мақалада бұл бағыт мемлекеттік басымдықтардың бірі екені және ел жаңа технологиялық дәуірге мамандар даярлауға ерекше мән беріп отырғаны көрсетілген.

Мақалада Қазақстанның жасанды интеллект пен цифрлық инновациялар бойынша өңірлік орталыққа айналуды көздеп отырғаны айтылды. Халықаралық инвесторлардың назарын аударатын факторлар қатарында Bloomberg Astana Hub қызметін, дата-орталықтардың дамуын, стратегиялық маңызы бар минералдар саласындағы жобаларды және «Астана» халықаралық қаржы орталығының жұмысын атаған.

Сондай-ақ, басылым елдің демографиялық әлеуетіне назар аударды.

«Қазақстан халқының шамамен жартысы 30 жасқа дейінгі жастар, бұл инновациялық экономика мен технологиялық кәсіпкерлікті дамытуға негіз болады. Қазақстан дәстүрлі шикізаттық экономика шеңберінен шығуға ұмтылып, технология, логистика, адами капитал және халықаралық ынтымақтастыққа басымдық беріп отырған мемлекет» деп сипаттайды олар.

Мақаладағы негізгі ойды қорыта айтсақ, Қазақстан әлемдік бизнес қауымдастығынан шеткері нарық емес, дербес экономикалық өсу орталығы әрі Еуразияның жаңа архитектурасын қалыптастырудағы маңызды мемлекеттердің  бірі ретінде қарастырыла бастаған.

Оқи отырыңыз:

• Тоқаев: Озық технологиялар еуразиялық интеграцияның қуатты катализаторына айналуы керек
• V Еуразия экономикалық форумы: Жасанды интеллект технологиялары ЕАЭО экономикасын қарқынды дамытады
• Тоқаев МАГАТЭ басшысына Иранның ядролық бағдарламасына қатысты мәселенің шешілуіне атсалысуға дайын екенін растады