Жангелдиндегі отбасы өлімі: Туыстары бірнеше ай бойы марқұмдармен хат жазысқан

Атырауда бес адамды өлтіру ісі бойынша сотта куәгерлерден жауап алынып жатыр, деп хабарлайды Orda.kz.

Сот барысында белгілі болғандай, айыпталушы қылмыстан кейін де марқұмдардың  атынан олардың туыстарымен бірнеше ай бойы хат жазысып жүрген. Қаза тапқан азаматтың немере ағасының айтуынша, күдік тек хаттардың жазылу мәнерінен кейін пайда болған.

«Наурыз әдетте қате жіберіп жазатын. Ал мұндағы хат алмасу стилі мүлде басқа болды», — деді ол сотта.

Куәгерлердің кейбірі сот залында айыпталушыға тікелей сұрақ қойды.

«Олардың не жазығы бар еді? Басыңды көтер!» — деді  туыстарының бірі.

Тағы бір куәгер:

«Әдетте адам бір рет пышақ салғаннан кейін қаннан қорқады. Ал мұнда жүрек тасқа айналғандай», — деп мәлімдеді.

Сотта қылмысқа қатысты жаңа деректер де айтылды. Тергеу мәліметінше, мәйіттердің жанынан қан іздері бар балта табылған. Бірақ ондағы қан жәбірленушілерге тиесілі емес болып шыққан. Сонымен қатар, үйдің кіреберісіндегі төсеніш астынан қосалқы кілт табылған. Оның кімге тиесілі екені және ол жерге қалай түскені әзірге анықталмаған.

Іс бойынша сот процесі жалғасып жатыр.