Ақтөбеде ер адамды бірнеше сағат бойы ұрып-соғып, көлігін біреудің атына рәсімдеуді талап еткен

Ақтөбеде бопсалау күдігімен бір топ адам ұсталды. Бұл туралы Orda.kz өңірлік полиция департаментіне сілтеме жасап хабарлайды.

Ведомствоның баспасөз қызметінің мәліметінше, Ақтөбе облысы ПД-нің ұйымдасқан қылмысқа қарсы күрес басқармасына 38 жастағы қала тұрғыны арызданған. Ол өзін бір топ адамның заңсыз ұстап, мүлкін бопсалағанын айтқан.

«Алдын ала мәлімет бойынша, бес күдікті жәбірленушінің танысына оның банк картасынан ақша аударылды деген сылтаумен, өздеріне тиесілі автокөлікті қайта рәсімдеуді, сондай-ақ ақша беруді талап еткен»,  деп хабарлады Ақтөбе облысының ПД. 

Тергеу нұсқасына сәйкес, күдіктілер ер адамды көлік ішінде заңсыз ұстап, бірнеше сағат бойы оған күш қолданып, заңсыз талаптарын орындатуға мәжбүрлеген.

Ұйымдасқан қылмысқа қарсы күрес басқармасы қызметкерлері арнайы бөлім сарбаздарын тарта отырып жүргізген операция нәтижесінде барлық бес күдікті анықталып, ұсталды.

Аталған факт бойынша бопсалау дерегімен сотқа дейінгі тергеп-тексеру жүргізіліп жатыр. Күдіктілер уақытша ұстау изоляторына қамалды.

Қазіргі уақытта оқиғаның барлық мән-жайын анықтауға бағытталған тергеу әрекеттері жүргізілуде. Сонымен қатар ұсталғандардың осыған ұқсас басқа да қылмыстарға қатысы бар-жоғы тексерілуде.

Оқи отырыңыз:

• Түрген өзенінде су деңгейі көтеріліп, туристер эвакуацияланды
• Алматыда еріген қар суы сел болып ағып, көпірді жұлып, жолды шайып кетті