Ақтөбе облысында өгей әкесі зорлаған қыз бала тағы да зорлыққа ұшырады

Ақтөбе облысының Темір ауданында өгей әкесі зорлық көрсеткен 15 жастағы оқушы тағы да жыныстық зорлыққа ұшырағаны хабарланды. Жасөспірім мән-жайды мектеп психологтарына айтып берген, деп хабарлайды Orda.kz.

Оқиға Ақтөбе облысының Темір ауданына қарасты ауылдардың бірінде болған. Оқушы бұл туралы мектеп психологтарымен әңгімелесу кезінде баяндаған.

«Оқиғаны мектептің психологы жеке жұмыс барысында анықтап, 12 қараша күні бөлімге хабарлады. Ал оқиға тамыз айында, яғни демалыс кезінде болған», – деп түсіндіреді Темір аудандық білім бөлімі. 

Қазіргі уақытта полиция кәмелетке толмаған адаммен жыныстық қатынасқа түсу фактісі бойынша тергеп-тексеру жүргізіп жатыр. Ресми мәлімет бойынша, күдікті анықталды.

«Қазіргі уақытта оқиғаның барлық мән-жайы анықталып жатыр. Күдікті полиция бөліміне жеткізілді. Тергеп-тексеру барысында қойылған уәждер жан-жақты қаралып, сондай-ақ оқиғаға қатысы бар немесе ол туралы мәліметі болуы мүмкін тұлғалардан жауап алынып жатыр»,  деп хабарлайды облыстық ПД-нің баспасөз қызметі.

Бұл оқушының жыныстық зорлыққа ұшырауы бірінші рет емес. Бұған дейін жасөспірімге өгей әкесі қорлық көрсетті деп айыпталып, сот өтті. Өгей әкесі ҚК-тің 124-бабы 3-бөлігі «Он алты жасқа толмаған адамдарды азғындық жолға түсіру» бойынша кінәлі деп танылып, 12 жылға бас бостандығынан айырылған.

Айта кетейік, бұған дейін өңірде 14 жастағы оқушының босанғаны туралы жазылған. Күдікті ретінде 64 жастағы өгей атасы қамауға алынған. 

Кейін психологиялық ауытқуы бар 17 жастағы қыздың зорлық көргені хабарланды. Оқиғаға қатысты полиция тергеу жүргізіп жатыр.

Автор: Ардақ Ерубаева