Ақтаудағы ұшақ апаты: Ресей іске қатысты құжаттарды зерттей бастады

Мәскеу соты 25 желтоқсанда Ақтауда құлаған әзірбайжандық Embraer-190 ұшағы апатына қатысты іс бойынша құжаттарды зерттеуді мақұлдады, деп хабарлайды Orda.kz.

РИА Новости агенттігінің хабарлауынша, құжаттар Ресейдің оңтүстігіндегі екі мекен-жайда алынады. Ұшақ апатына қатысты қылмыстық істі Ресей Федерациясының Тергеу комитеті жүргізіп жатыр. Шешім заңды күшіне енді.

Қандай құжаттар және қандай мекен-жайларда тәркіленетінін ресейлік басылым атамады. Басқару станцияларының деректері туралы сөз болуы да мүмкін.

Бакуден Грозныйға ұшқан Әзірбайжан әуе компаниясының Embraer-190 ұшағы 2024 жылы 25 желтоқсанда таңертең Ақтау әуежайына шұғыл қонуға әрекеттенген кезде апатқа ұшырады.

29 желтоқсанда Гейдар Әлиев атындағы халықаралық әуежайда Баку-Грозный рейсін орындаған «Әзірбайжан әуе жолдары» (AZAL) ЖАҚ-ның Embraer-190 жолаушылар ұшағының апатынан қаза тапқан экипаж мүшелерімен  қоштасу рәсімі өтті.

Бортта 69 адам болған, оның 29-ы аман қалған. Тәуелсіз Қазақстан тарихында бұл жаппай қаза тапқан алтыншы ұшақ апаты. Ұшақ апатынан кейінгі үшінші күні журналистерге  Ақтау маңындағы апатқа ұшыраған лайнердің сынықтарын жақыннан көруге рұқсат берілді.

 Ресей президенті Владимир Путин Әзірбайжан басшысы Ильхам Әлиевтен Ақтауда апатқа ұшыраған AZAL ұшағы үшін кешірім сұрады.

Ұшақ қалдықтарын зерттегеннен кейін мамандар бөгде заттар әсерінен көптеген перфорациялық зақымдарды анықтады. Әзірбайжан тарапы апаттың себебі фюзеляжды тесіп өткен  ресейлік «Панцирь-С» зениттік зымырандарының сынықтары екеніне сенімді.

 Әзірбайжан қазір ұшақ апатына байланысты халықаралық сотқа шағым түсіріп жатыр. Ресейде қатарласа тергеу жүргізіп жатыр.