Мәскеу кінәсін мойындауы керек: AZAL апатына байланысты Әзірбайжан халықаралық сотқа жүгінеді

Қазіргі уақытта Баку дәлелдер мен фактілерді жинап жатыр, деп хабарлайды Orda.kz

Ара Әзірбайжан ақпарат агенттігінің хабарлауынша, Әзірбайжанда ұшақты атып түсірген «Панцирь-С» зымырандарының бөліктері бар. 

«Дәлелдемелік база қалыптастырылып, фактілер мен дәлелдемелер жиналып, халықаралық сотқа жүгінуге дайындық жүріп жатыр. Алайда Ресеймен диалогтың есігі ашық. Мәскеу өз кінәсін ашық мойындап, жауапкершілікті өз мойнына алуы керек. Әйтпесе, Баку келесі қадамдарға дайын» деп жазады АРА. 

ҚР Көлік министрлігі Azerbaijan Airlines авиакомпаниясының Embraer-190 әуе кемесімен болған авиациялық оқиғаны тергеу туралы алдын-ала есепті жариялады. Сарапшылар бөгде заттардың әсерінен болатын көптеген зақымдарды тапты. Олардың сипаты мен шығу тегін анықтау үшін тиісті зерттеулер мен сараптамалар жүргізіледі. 

25 желтоқсанда Баку — Грозный рейсін орындаған жолаушылар ұшағы Ақтау әуежайының маңында апатқа ұшырады. Ұшақ апатынан 38 адам қаза тапты, оның ішінде алты Қазақстан азаматы бар.