АҚШ-тың Иранға қарсы операциясы аяқталды: Вашингтон жаңа кезеңге аяқ басты

АҚШ Иранға қарсы жүргізілген «Эпикалық қаһар» әскери операциясының аяқталғанын жариялады. Бұл туралы Марко Рубио Ақ үйдегі баспасөз конференциясында мәлімдеді, деп хабарлайды Orda.kz.

Оның айтуынша, 28 ақпанда басталған операция аяқталып, қойылған мақсаттарға қол жеткізілген. Конгресті хабардар еткеннен кейін АҚШ жаңа кезеңге өткенін мәлімдеді.

«Енді біз  «Бостандық жобасы» операциясына кірістік», — деді Рубио. 

Бұған дейін Пентагон бұл әскери науқанға шамамен 25 млрд доллар жұмсалғанын бағалаған. Алайда америкалық БАҚ деректеріне сәйкес, нақты шығындар 50 млрд долларға дейін жетуі мүмкін.

АҚШ Қорғаныс министрлігінің түсіндіруінше, жаңа «Бостандық жобасы» операциясы шектеулі әрі қорғаныс сипатында. Оның мақсаты — Ормуз бұғазында коммерциялық кемелерді сүйемелдеу және теңіздегі қауіпсіздікті қамтамасыз ету.

Дональд Трамп бұл бастама қақтығыс аймағында қалған шетелдік кемелерге көмектесуге бағытталғанын және гуманитарлық сипатқа ие екенін айтқан. Оның сөзінше, мұндай өтінішпен Вашингтонға түрлі елдер жүгінген. Ал Пит Хегсет «Бостандық жобасы» алдыңғы операциядан өзгеше екенін және шабуылдаушы әрекеттерді көздемейтінін атап өтті.

Кейінірек Трамп Truth Social желісінде бұл жобаны іске асыру уақытша тоқтатылғанын, себебі Иранмен бейбіт келісім жасау мүмкіндігін бағалау қажет екенін жазды. Оның айтуынша, мұндай өтініш Пәкістан тарапынан, келіссөздерде делдал ретінде, сондай-ақ басқа да елдерден түскен.

Иран тарабы бұл мәлімдемелерге ресми түрде пікір білдірген жоқ. Бұған дейін ел парламентінің спикері Мохаммед-Багер Ғалибаф АҚШ пен оның одақтастарының әрекеттері, соның ішінде блокада, аймақтағы кеме қатынасының қауіпсіздігіне қатер төндіретінін мәлімдеген еді.

Оқи отырыңыз:

• Трамп: Иран Ормуздан өткен АҚШ кемелеріне тиіссе — жер бетінен жойылады
• Иран АҚШ-қа 14 тармақтан тұратын бейбіт жоспар жолдады
• Иран Ормуз бұғазына жақындаған шетелдік қарулы күштерді аямайтынын ескертті