АҚШ-та жарты ғасырдан бері алғаш рет әскерилердің өлім жазасы орындалуы мүмкін

АҚШ-та жарты ғасырдан астам уақыттан бері алғаш рет әскери қызметкерлерге өлім жазасы орындалуы мүмкін, деп хабарлайды Orda.kz.       

Бұл туралы ABC News АҚШ Құрлық әскерлерінің ішкі құжатына сілтеме жасап хабарлады.

«Шешімді әділет» (Resolute Justice) кодтық атауымен әзірленген жоспар биылғы жылдың ақпан айында ішкі пайдалануға таратылған. Құжатта кісі өлтіру және зорлау қылмыстары үшін сотталған америкалықтарға қатысты ең жоғары жаза — өлім жазасын орындауға дайындық шаралары қарастырылған. Жаза Терре-Хот қаласындағы түрмеде жүзеге асырылуы мүмкін.

АҚШ армиясының бірнеше бөліміне, егер тиісті бұйрық берілсе, оны орындауды қамтамасыз ету тапсырылған. Құжатқа сәйкес, өлім жазасы туралы үкімдерді Дональд Трамп мақұлдаған күннен бастап 150 күннен кешіктірмей орындау көзделген.

Соңғы рет АҚШ-та әскери қызметкерге өлім жазасы 1961 жылы қолданылған. Сол жылы қатардағы жауынгер Джон Беннетт Австрияда 11 жастағы қызды зорлап, өлтіруге әрекеттенгені үшін өлім жазасына кесілген болатын.

Еске салсақ, АҚШ Әділет министрлігі федералдық өлім жазаларына жарияланған мораторийді алып тастап, үкімді орындау тәсілдерінің бірі ретінде ату жазасын қайта енгізгенін жазғанбыз. 

Бұл шешім Дональд Трамптың бастамасына қатысты. Ол жаңа президенттік мерзімінің басында аса ауыр қылмыстар үшін жазаны қатаңдатуды ұсынған болатын. Оның пікірінше, мұндай қатаң шаралар «ең сорақы қылмыстардың алдын алу және жәбірленушілерге қатысты әділеттілікті қалпына келтіру үшін шешуші маңызға ие».

Оқи отырыңыз:

• Израильде өлім жазасы неге бәріне бірдей жүрмейді? Заңға шолу және халықаралық реакция
• Ату жазасы АҚШ-та өлім жазасын орындау тәсілі ретінде қайта енгізілді
• Қытайдың екі экс-қорғаныс министрі өлім жазасына кесілді