АҚШ пен Иран бітімге келе қоймады: Трамптың қоқан-лоққысынан шаршаған Тегеран наразылық білдірді

Швейцарияда АҚШ пен Иран арасындағы келіссөздердің алғашқы кезеңі өтуде. Бұл кездесу барлық бағыттардағы, соның ішінде Ливандағы әскери әрекеттерді тоқтатуға бағытталған өзара түсіністік туралы меморандумға қол қойылғаннан кейін ұйымдастырылды, деп хабарлайды Orda.kz.       

Алайда келіссөздер аясында АҚШ-тың бұрынғы президенті Дональд Трамп Иранға қайтадан соққы беруі мүмкін екенін айтып, қоқан-лоққы жасады. Осыған байланысты ирандық делегация америкалық тарапқа наразылық білдіріп, «тиісті жауап» беру нұсқаларын қарастырып жатқанын мәлімдеді.

Кездесу Ормуз бұғазы төңірегіндегі жаңа келіспеушіліктер мен Израильдің Ливанға жасаған соққылары аясында жалғасып жатыр.

Reuters агенттігінің жазуынша, Тегеран Вашингтонды Ливандағы әскери әрекеттерді тоқтату жөніндегі міндеттемелерін орындамады деп айыптап, Ормуз бұғазын қайта жапқанын хабарлаған. Сондай-ақ жексенбі күнгі келіссөздерде Иранның ядролық бағдарламасы сияқты маңызды мәселелер қаралмайтыны айтылған.

АҚШ делегациясын басқарған вице-президент Джей Ди Вэнс келіссөздер басталар алдында АҚШ тек Ормуз бұғазын ашу немесе Иранның ядролық бағдарламасын тоқтату мәселелерімен ғана шектелмей, екі ел арасындағы қарым-қатынасты өзгертуге де ұмтылып отырғанын жеткізді.

«Енді мәселе — біз бірге тағы қандай нәтижеге қол жеткізе аламыз. Таяу Шығыстағы қарым-қатынастарды түбегейлі өзгерте аламыз ба, әлде өзімізге ұнамайтын, бірақ әбден мүмкін бұрынғы тәсілдерге қайта ораламыз ба?» — деді ол. 

Ал Трамп келіссөз өтетін күні  TruthSocial әлеуметтік желісінде Иранға үндеу жасап:

«Иран Ливандағы жоғары жалақы алатын сенімді өкілдері арқылы қиындық тудыруды дереу тоқтатуы тиіс. Әйтпесе, біз Иранға қайтадан өте күшті соққы жасаймыз. Өткен аптадағыдай, бірақ одан да қатты!» деп жазды. 

Катар мен Пәкістан да қатысқан келіссөздер басталар алдында ирандық делегация АҚШ өкілдерімен жоспарланған қол алысу рәсімі мен бірлескен фотосессиядан бас тартты. Ал келіссөз басталғаннан кейін 80 минут өткен соң «үзіліс пен ішкі кеңес үшін» уақытша тоқтатылғаны туралы Mehr агенттігі хабарлады.

Кейінірек  Tasnim агенттігі Иран делегациясы Трамптың сөз жүзіндегі қоқан-лоққыларына байланысты АҚШ жағына ресми наразылық білдіргенін және мұндай мәлімдемелер меморандумды өрескел бұзу болып саналатынын атап өтті.

Катар Сыртқы істер министрлігінің мәліметінше, келіссөздер барысында тараптар болашақ қорытынды келісімнің тармақтарын келісу үшін жұмыс топтарын құрған. Сонымен қатар меморандумның орындалуын және оның жүзеге асу барысын бақылау үшін арнайы мониторинг топтары да жасақталған.

Оқи отырыңыз:

• Израильдік БАҚ: Иран АҚШ-пен келіссөздердің 60 күндік кезеңі арқылы «уақыт ұтуды» көздеп отыр
• Ормуз бұғазы маңындағы Иран портында Қазақстанның өз алаңы болады
• АҚШ пен Иран арасындағы өзара түсіністік меморандумының ресми жобасы жарияланды